Hofregulasies niks nuuts, sê regbank

Die kantoor van die regbank het gister joernaliste wat die Fishrot-korrupsieskandaal se hofverrigtinge bygewoon het, onkant gevang.

Die joernaliste is daaraan herinner dat geen beeldmateriaal of klankgrepe van die hof of hofverrigtinge – volgens regulasies – sonder toestemming opgeneem mag word nie.

Die nasionale staatsmedia, NBC, was die uitsondering aangesien hulle glo vir toestemming aansoek gedoen het.

Talle joernaliste was onder die indruk dat beeldmateriaal opgeneem kan word voor ’n voorsittende regter die hofsaal betree.

Die woordvoerder van die kantoor van die regbank, Vikitoria Hango, sê egter dié regulasies is reeds jare lank van toepassing.

“Dit is seker gedeeltelik ons fout omdat ons dit nie altyd toegepas het nie,” het sy gesê.

Sy hou vol die status van en belangstelling in die Fishrot-verhoor het geen invloed op die besluit gehad nie.

“Hierdie regulasies bestaan reeds ’n geruime tyd. Dit kom nie van ses maande of ’n jaar gelede nie, dit is nou al jare,” het Hango gesê.

Sy sê ook die regulasies en veral die strafregtelike gevolge om die regulasies te minag, geld ingevolge die Strafproseswet.

Die regulasies beskerm die regte van beskuldigdes, juis omdat hulle as onskuldig beskou word tot hulle deur ’n bevoegde hof skuldig bevind word, het Hango gesê.

UNIE ANTWOORD

Die Vakbond vir Namibiese Professionele Mediapraktisyns (Nampu) het in ’n mediaverklaring gesê vrye pers is noodsaaklik vir ’n gesonde demokratiese land.

“’n Vrye en lewende media is onontbeerlik vir die behoorlike funksionering van ’n demokratiese samelewing. Joernaliste dien as die oë en ore van die publiek en verseker dat burgers behoorlik ingelig is oor sake van openbare belang, insluitend hofverrigtinge,” luidens die verklaring.

Die vakbond het gesê die inperking van joernaliste se vermoë om in alle aspekte verslag te lewer oor hofverrigtinge, mag die deursigtigheid van verrigtinge in twyfel trek.

“Die onlangse voorvalle by die hooggeregshof in Windhoek wek kommer oor die beginsels van ’n vrye pers en deursigtige geregtigheid, wat noodsaaklike pilare van ons demokratiese stelsel is. In die konteks van die sogenaamde Fishrot-saak beklemtoon ons die kritieke rol van die media om aanspreeklikheid en deursigtigheid te verseker,” lui die verklaring.

Nampu het ’n beroep op die regbank gedoen om die regulasies dringend te hersien en gesê samewerking tussen die regbank en die media is noodsaaklik om deursigtigheid te bevorder.

FISHROT

Die memorandum wat gisteroggend met joernaliste gedeel is, sluit ook ’n byvoegsel in met regulasies wat spesifiek betrekking het op die Fishrot-verrigtinge – soos versoek deur die voorsittende regter, Moses Chinhengo.

Hango sê ’n voorsittende regter mag in konsultasie met die regterpresident, Petrus Damaseb, spesifieke regulasies uiteensit vir ’n spesifieke verhoor.

Ingevolge dié regulasies mag daar onder meer geen opname; in stilbeeld, op video of in klank; geneem word van enige beskuldigde in die beskuldigdebank direk of indirek van voor af nie. Geen opname van enige regsverteenwoordigers, hetsy staatsaanklaers of die beskuldigdes se verteenwoordigers – direk of indirek van voor af – word toegelaat nie. Geen opnames van lede van die publiek word toegelaat nie.

Geen opname van die aanhoudingselle, die ingang tot die aanhoudingselle, die ingang vir voertuie van die aanhoudingselle, die hof se kantore, hofkamers, die gebou van die hoërhof of enige verwante dele van dié gebou word ingevolge die regulasies toegelaat nie.

ׄ– [email protected]