Hof verbied Droombos om funksies aan te bied

Droombos is ingevolge ’n hofbevel van die hoërhof verbied om geleenthede aan te bied en as ’n venue te funksioneer.Dit kom nadat Stad Windhoek (CoW) hulle hof toe gesleep het omdat Droombos slegs toestemming en goedkeuring het om ’n gastehuis en konferensiegeriewe te bedryf.Droombos het aangevoer dat die toestemmingsgebruik (consent use) geïnterpreteer moet word dat dit die reg om funksies en geleenthede aan te bied, insluit.“Die toestemmingsgebruik wat aan die respondent [Droombos] toegestaan is, is beperk tot die gastehuis en konferensiegeriewe. Dit sluit nie die aanbied van funksies in nie.“Die respondente se interpretasie van die toestemmingsgebruik dat dit funksies insluit, is verkeerd,” lui regter Nate Ndauendapo se uitspraak wat Vrydag gelewer is.Network Media Hub (NMH) het Droombos se eienaars genader vir kommentaar oor of hulle van plan is om teen die uitspraak te appelleer.“Droombos se regspan werk tans deur die uitspraak om te besluit oor die regte stap vorentoe om sy regte in hierdie saak te beskerm.“Droombos het toestemming om konferensiegeriewe te bedryf en na ons wete is daar geen konferensielokaal in Namibië wat nie funksies mag aanbied nie,” het Kallie van der Merwe gesê.Droombos het egter nie gereageer op vrae in verband met hoe hulle van plan is om te werk te gaan met geleenthede en funksies wat reeds bespreek is nie.GOEDKEURINGCoW het reeds in Augustus 2012 die toestemmingsgebruik aan die vorige eienaars van Droombos toegestaan. Die aansoek was destyds vir ’n gastehuis met 10 kamers wat konferensiegeriewe ingesluit het. Die aansoek is glo toegestaan gebaseer op ’n aantal voorwaardes. In Desember 2017 is Droombos aan nuwe eienaars verkoop.CoW het in sy aansoek aangevoer dat hy in Maart ’n brief aan Droombos gerig het waarin beswaar gemaak is teen bouwerk op die perseel wat glo sonder goedgekeurde boupermitte uitgevoer is.“Die respondent het konstruksiewerk op die eiendom uitgevoer vir doeleindes van sy huidige besigheid, welke konstruksie-aktiwiteite buite die bestek van die bestaande boupermitte en -planne was,” lui CoW se hofstukke.Die kwessie oor die toestemmingsgebruik het reeds in Oktober 2019 begin toe CoW Droombos glo ingelig het dat die aanbied van funksies nie strook met die goedkeuring wat vir die gebruik van die perseel uitgereik is nie.“Geen goedkeuring is aan die respondente verleen om twee groot venuesale, ’n vermaakarea, ’n restaurant of ’n venue te bedryf nie.”In April 2023 het CoW glo ’n kennisgewing uitgereik wat Droombos beveel het om alle ongemagtigde grondgebruik te staak.“Die respondente het ontken dat dit ongemagtigde grondgebruik uitvoer en het voortgegaan om geleenthede aan te bied.”Droombos het in die aansoek aangevoer dat daar geen definisie vir konferensiegeriewe in CoW se skema of toestemmingsgebruik ingesluit is nie.“In die afwesigheid van ’n definisie van ‘konferensie’ en wat dit behels, moet die respondent [Droombos] se weergawe aanvaar word,” het Droombos se regspan aangevoer.UITSPRAAK“Met inagneming van die wesenlike bepalings van die aansoek om ’n gastehuis en konferensiegeriewe te bedryf, tesame met die bepalings van die toestemmingsgebruik wat uitgereik is, was die respondent slegs geregtig om ’n gastehuis en konferensiegeriewe te bedryf,” lui die uitspraak.Die hofbevel verbied Droombos en enige ander persoon wat namens Droombos optree, om ’n geleentheids- of vermaaklikheidslokaal en/of sosiale- of saal en alle verwante aktiwiteite in stryd met die voorwaardes van die toestemmingsgebruik te bedryf.Ndauendapo het ook beveel dat Droombos CoW se regskoste moet betaal.GERAASDaar was egter ook ’n gedeelte van CoW se aansoek wat misluk het. Buiten vir die versoek vir ’n interdik teen die bedryf van ’n venue, het hulle die hof versoek om Droombos te verbied om klank bo ’n sekere aantal desibel (dB) te maak. CoW wou Droombos beperk dat klank gedurende die dag nie 55 dB moet oorskry en in die aand 45 dB nie. Dié versoek is van die hand gewys.“In die afwesigheid van enige wetgewende bepaling wat voorsiening maak vir ’n spesifieke klankvlak vir ’n spesifieke tyd, op ’n spesifieke plek en binne ’n spesifieke sone, is die verwysing na 55 dB en 45 dB arbitrêr en het geen wetgewende of feitelike grondslag nie,” lui Vrydag se uitspraak.– kristien@nmh-hub.com.na

Hof verbied Droombos om funksies aan te bied

Kommentaar

Republikein 2026-02-20

Meld asseblief aan om kommentaar te lewer

Hof verbied Droombos om funksies aan te bied

Kommentaar

Republikein 2026-02-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.