Hof sê RedForce moet bly (vir nou)

Kristien Kruger en Leandrea Mouers – Die hoërhof het Dinsdag ’n tussentydse interdik toegestaan wat die Walvisbaaise munisipaliteit verbied om voort te gaan met die beëindiging van sy skuldinvorderingskontrak met RedForce.Regter Thomas Masuku het beslis dat die munisipaliteit nie sy besluit – wat op 23 April geneem is nadat dié dorp se inwoners teen RedForce betoog het – kan implementeer nie, hangend die afhandeling van ’n hofsaak wat RedForce teen die munisipaliteit aanhangig gemaak het.In die hofaansoek daag RedForce die munisipaliteit se besluit uit om sy kontrak te beëindig en eis dat die besluit tersyde gestel moet word.RedForce het die Walvisbaai-stadsraad en die munisipaliteit se waarnemende uitvoerende hoof en raadslid, Ephraim Shozi, as respondente in sy dringende aansoek gelys wat Saterdag by die hof ingedien is.RedForce het in die hofaansoek aangevoer dat die maatskappy ongeveer N$3 miljoen se verliese sal ly indien die kontrak beëindig word.AGTERGRONDDie mosie om RedForce te verwyder is op 23 April tydens ’n spesiale raadsvergadering ter tafel gelê.Shozi het die munisipaliteit se bestuur daarvan beskuldig dat hulle versuim het om die raad se goedkeuring te verseker toe hulle die tender vir skuldinvordering geadverteer het, waarvoor RedForce ’n kontrak van vyf jaar toegeken is.Selma Nangombe, RedForce se meerderheidseienaar en bedryfshoof, het aangevoer dat Shozi op 8 Maart 2022, toe RedForce – op eie inisiatief – ’n voorlegging aan die munisipale bestuur en raadslede gedoen het oor sy begeerte om skuldinvorderingsdienste aan die munisipaliteit te verskaf, onder die deelnemers was.In reaksie op die bewering dat raadslede nie ingelig is nie, sê Nangombe die munisipaliteit het in Maart 2023 ’n openbare tender vir ’n skuldinvorderaar geadverteer. RedForce het aansoek gedoen en is in plaaslike koerante en op sosialemediaplatforms as die suksesvolle tenderaar aangekondig.As deel van die kontrak sou alle munisipale rekeninge wat vir 60 dae of langer agterstallig was aan RedForce oorhandig word vir invordering. Dié rekeninge, meer as 10 000, het die munisipaliteit destyds altesaam meer as N$337 miljoen geskuld.Prestasiegewys, sê RedForce hy het in die eerste drie maande van sy kontrak N$45 miljoen ingesamel nadat hy sy bedrywighede in Walvisbaai in Augustus 2023 afgeskop het. Teen Maart vanjaar het die invorderaar na bewering sowat N$84 miljoen vir die munisipaliteit ingesamel. – republikein@republikein.com.na

Hof sê RedForce moet bly (vir nou)

Kommentaar

Republikein 2026-02-04

Meld asseblief aan om kommentaar te lewer

Hof sê RedForce moet bly (vir nou)

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.