Hof sê kind bly vir nou by pa

In die hofsaak tussen twee ouers oor die toesig van hul agtjarige seun, het die hof vandeesweek beslis die seun se primêre woning moet verskuif van waar hy saam met sy ma en halfboetie in Suid-Afrika gewoon het, na sy pa in Windhoek.

Die uitspraak was in sterk kontras met ’n verslag van ’n senior maatskaplike werker wat aanbeveel het dat die seun by sy ma moet bly.

“Die hof bevind dat dit in die beste belang van die kind sal wees dat hy in Namibië bly waar hy 'n volwaardige burger is. Dit sal verkeerd wees van hierdie hof om ’n minderjarige burger van hierdie land, na 'n ander land te stuur waar hy as 'n onwettige buitelander beskou word, met geen magtiging om in daardie land te wees of te bly nie,” lui regter Orben Sibeya se uitspraak.

Die hofbevel is egter net tydelik tot die gepaste hof ’n beslissing maak oor die seun se primêre woning.

Die uitspraak volg nadat die seun se pa ’n dringende aansoek by die hof aanhangig gemaak het met die versoek dat sy seun by hom bly en nie moet terugkeer na sy eksvrou nie op grond van bewerings dat sy by ’n inrigting vir ’n geestesversteuring opgeneem is, sy selfdoodneigings gehad het en onlangs uit die huis getrek het wat sy met haar nuwe man gedeel het. Sy woon tans by haar ouers.

Die ma het die aantygings ontken en die hof verseker haar depressie is onder beheer. Sy het verder aangevoer sy moes uit die huis trek wat sy met haar man deel aangesien hy haar glo aangerand het.

Die hoërhof het beveel dat die kind se omstandighede ondersoek en aanbevelings oor sy toesig ingedien moet word. Na aanleiding hiervan het ’n senior maatskaplike werker ’n ondersoek behartig waarna sy ’n verslag by die hof ingedien het.

Sy het bevind dat die ma tans in ’n meer standvastige omgewing is en stappe geneem het om haar persoonlike omstandighede te verbeter.

“Die bekommernis dat die respondent geestelik siek is en selfdoodneigings het, is afgekeur aangesien sy hulp gesoek het wanneer dit nodig was en nou haar depressie goed bestuur. Sy het ook die nodige ondersteuning,” lui die verslag.

Die verslag het verder aanbeveel dat die pa steeds redelike toegang tot sy kind moet hê en hom gereeld kan sien.

Sibeya het in sy uitspraak daarop gewys dat die maatskaplike werker se gevolgtrekkings nie ondersteun word deur die vasgestelde feite van die saak nie.

“Die kommer oor die veiligheid van die kind, hoe minimaal ook al, kan nie geïgnoreer word nie. Die erkende feit dat die respondent weens depressie in 'n geestesgesondheidsfasiliteit opgeneem is, weeg myns insiens ook ten gunste van toestaan van die aansoek,” lui die uitspraak.

Die seun se ma het onlangs na ’n ander dorp in Suid-Afrika getrek om weg van haar huidige man te kom en die hof het beslis dat dit nog ’n aspek is wat in ag geneem moet word.

“Dit is voldoende om te sê dat dit in die beste belang van die kind sal wees om by 'n plek te woon waarmee hy bekend is, in teenstelling met 'n vreemde plek.”

Die ma het wel steeds toegang tot haar kind en kan hom gereeld sien vir die tyd en wyl ’n hof ’n finale bevel oor die seun se primêre woning uitreik. - [email protected]