Hof sê Ally moet meer as ’n miljoen aan bank betaal

Die presidentskandidaat en geoktrooieerde rekenmeester, Ally Angula, het ’n hofstryd teen Nedbank Namibia verloor oor ’n persoonlike leningsooreenkoms van meer as N$4,7 miljoen en is beveel om N$1,25 miljoen aan die bank te betaal.Angula se voormalige swaer, Glenny Matswetu, en sy sakevennoot Sajee Poulose, het in 2006 en 2008 aandele in Impact Distribution Namibia (Bpk), die gelisensieerde verspreider van Microsoft-produkte in Namibië, gekoop.Hulle het glo Angula genader om ’n minderheidsaandeelhouer in die maatskappy te word.Matswetu en Poulose het N$1 miljoen in oortrokke fasiliteite (overdraft) van Nedbank Namibia nodig gehad, waarvoor Angula borg geteken het.Hulle het daarna die limiet van die oortrokke fasiliteite verhoog, en ’n bankwaarborg is aan hulle toegestaan.PLEEG KONTRAKBREUKTeen 2011 het Impact se rekening egter so agteruitgegaan dat die bank gedwing is om die waarborge te herroep.Angula, wat as eerste verweerder gelys is, en haar man, Manna Blessing Jonah Matswetu, met wie sy binne gemeenskap van goedere getroud was, is ses jaar gelede deur Nedbank Namibia hof toe gesleep vir die verbreking van die leningsooreenkoms.Die oorspronklike persoonlike lening van N$4,7 miljoen, wat op 14 Desember 2012 onderteken is, was veronderstel om op 21 Desember van daardie jaar met ’n enkelbedrag van N$650 000 terugbetaal te word, het die bank gesê. Daarna moes maandelikse betalings van N$45 000 gemaak word tot die skuld vereffen is.Angula, ’n voormalige adjunkdirekteur in die ministerie van finansies, het egter glo geweier om die uitstaande betalings te vereffen. In haar uitspraak Vrydag het regter Hannelie Prinsloo in die hoërhof gesê dit is duidelik dat Angula tot die lening ingestem het, maar probeer het om die gevolge te vermy.Die regter het daarop gewys dat die lening vir twee oortrokke fasiliteite vir Impact Distribution Namibia was, waarvan Angula ’n aandeelhouer was. Angula het onder meer borg vir hierdie fasiliteite geteken.Toe Impact versuim het om sy leningsooreenkoms na te kom, het Angula die saak met die bank opgeneem, aangesien sy destyds ’n geoktrooieerde rekenmeester by KPMG was en haar akkreditasie in gevaar was.“Angula het vrywillig Impact se aanspreeklikheid aanvaar, en daardie aanspreeklikheid het die fooie en die N$2 miljoen-afskrywings ingesluit, wat die bank van haar persoonlike lening kon verhaal. Angula het dit alles geweet en sou in ’n selfs beter posisie gewees het om Impact se aanspreeklikheid te oorweeg as gevolg van haar kundigheid as geoktrooieerde rekenmeester,” het Prinsloo gesê.Die hof het beklemtoon dat Angula die leningsooreenkomste nagekom het en selfs die enkelbedrag van N$650 000 begin afbetaal het. Dit blyk egter dat haar probleme met Impact se blootstelling eers ontstaan het toe sy finansiële probleme ondervind het.“In daardie stadium was sy nie meer by KPMG nie, en het in ’n boerdery-onderneming gegaan wat nie die opbrengs gelewer het wat sy verwag het nie.”Die regter het ook daarop gewys dat Angula “duidelik uit die oog verloor het dat sy ’n onbeperkte borg ten gunste van Nedbank Namibia onderteken het”.Angula het glo die skuldbedrag op N$3,6 miljoen bereken voordat sy die persoonlike leningsooreenkoms onderteken het, maar sy het later haar deuntjie verander en haarself van dié skuld gedistansieer.– republikein@republikein.com.na

Hof sê Ally moet meer as ’n miljoen aan bank betaal

Kommentaar

Republikein 2025-11-03

Meld asseblief aan om kommentaar te lewer

Hof sê Ally moet meer as ’n miljoen aan bank betaal

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.