Hof beskerm gesag van tradisionele owerheid

Die hoërhof het Vrydag finaal beslis dat die Uukwambi Tradisionele Owerheid die regsgesag oor sy jurisdiksiegebied uitoefen en geen geleentheid in dié gebied gehou kan word sonder die toestemming van die tradisionele owerheid nie.Dié beslissing is gemaak in ’n dringende aansoek wat die tradisionele owerheid teen twee van sy gemeenskapslede gebring het. Die lede, William Amwaama en Seblon Shivolo, het beplan om verlede maand ’n herdenkingsgeleentheid aan te bied sonder die vooraf goedkeuring van die tradisionele owerheid.Voor die geleentheid egter op 17 Augustus kon plaasvind, het die hof ’n interdik uitgereik wat dit verbied het.Regter Thomas Masuku het Vrydag uitspraak gelewer in die dringende aansoek en beslis dat die owerheid die wetlike gesag het om alle tradisionele seremonies en geleenthede binne sy jurisdiksie te reguleer.Ingevolge die hofbevel word Amwaama en Shivolo belet om die geleentheid te hou of enigsins verder te beplan. Hulle mag verder ook nie 15 Augustus, of enige ander datum, as die dag van die herdenking van die Uukwambi-hoofmanne verklaar nie.“Die interdik is uitgereik om die integriteit van die Uukwambi Tradisionele Owerheid se gesag te beskerm en om enige verder optrede te verhoed wat die gemeenskap kan destabiliseer,” lui die uitspraak.Die uitspraak beveel verder dat Amwaama en Shivolo die regskoste vir die aansoek moet betaal.AGTERGRONDDie tradisionele owerheid het in sy aansoek aangevoer dat die beplande geleentheid soortgelyk is aan ’n geleentheid wat die owerheid vir volgende jaar beplan.“Hulle is ingelig dat die geleentheid wat georganiseer is, ongemagtig is en in stryd is met die gesag van die owerheid. Dit sal moontlik onenigheid veroorsaak, asook die vrede en welsyn van lede van die gemeenskap versteur,” het hoofman Herman Iipumbu in sy verklaring gesê.Hy het bygevoeg dat Amwaama en Shivolo versoek is om nie die geleentheid aan te bied nie; hulle het egter die versoek geweier. Iipumbu was glo ook daarvan oortuig dat Amwaama en Shivolo se optrede daarop gemik was om gemeenskapslede te mislei en het geglo hulle gebruik dit as ’n rookskerm om die aanstelling van ’n nuwe “koning vir die Uukwambi-volk” te mobiliseer en om so moontlik ’n persoon strydig met die bepalings van die wet aan te wys.Masuku het in sy uitspraak bevind Amwaama en Shivolo het wel onwettig opgetree en dit moontlik kon lei tot die ontwrigting van die owerheid se vrede en eenheid.– kristien@nmh-hub.com.na

Hof beskerm gesag van tradisionele owerheid

Kommentaar

Republikein 2025-11-04

Meld asseblief aan om kommentaar te lewer

Hof beskerm gesag van tradisionele owerheid

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.