Hengari sê N$220 000 was vir ‘plaasverpligtinge’

Die voormalige minister van landbou, visserye, water en grondhervorming, Mac Hengari (59), het Woensdag getuig die kontant wat vroeër vanjaar op hom gevind is en wat gelei het tot sy inhegtenisneming en verskeie aanklagte teen hom, is onttrek om plaasverwante uitgawes, insluitend personeelsalarisse, te dek.

“Vroeër daardie dag en voor my inhegtenisneming, het ek saam met my vrou, Zelna Hengari, na die plaas gery en later dieselfde dag na Windhoek teruggekeer. Ek het 'n vergadering met my medebeskuldigde, die beweerde verkragtingslagoffer, en hul prokureur, Elia Shikongo, geskeduleer om te bespreek hoe hulle van plan is om die proses te bestuur om die verkragtingsbeskuldigings wettiglik terug te trek,” het Hengari gister gesê.

“Ek het destyds N$220 000 by my gehad wat bedoel was vir plaasverwante verpligtinge, insluitend maandeinde-betalings aan werkers en ander verantwoordelikhede,” het hy verduidelik.

Hengari het getuig tydens sy borgtogverhoor in die Windhoek-landdroshof van die gebeure wat gelei het tot wat hy beskryf het as sy “valstrik”-arrestasie op 26 April vanjaar.

Die borgtogverhoor het Maandag voor landdros Monica Andjaba begin.

Mediaberigte

Volgens Hengari, wat deur Mekumbu Tjitere verteenwoordig word, het hy eers ná sy aanstelling as minister van landbou in Maart vanjaar bewus geword van die kriminele klag teen hom. Dit ten spyte van die feit dat die klag formeel in November 2023 in Oshakati ingedien is.

“Nadat ek as minister van landbou aangestel is, het ek van hierdie beskuldigings van verkragting deur middel van mediaberigte en koerantartikels te hore gekom,” het Hengari aan die hof gesê.

Die voormalige minister van landbou het ook getuig dat hy op die dag van sy inhegtenisneming na Shikongo se kantoor gery het soos vroeër gereël en gewag het om met die betrokke partye te vergader.

“Ek het sowat 30 tot 40 minute gewag, maar hulle het nie opgedaag nie,” het hy gesê.

Hy het getuig dat die vrou wat hom van beweerde verkragting beskuldig het, “gevra het om by Francesco se restaurant in die dorp te ontmoet, en na 'n lang heen-en-weer- gesprek het ek ingestem.”

Met sy aankoms het die beweerde verkragtingslagoffer en haar broer, nou Hengari se medebeskuldigde, reeds vir hom gewag.

Ontmoeting

Hengari ontken dat hy die beweerde verkragtingslagoffer in 2019 ontmoet het, die jaar wat sy beweer dat hy haar aangerand het.

“Ek het haar nooit in 2019 ontmoet nie. Op daardie tydstip was ek in die Verenigde Koninkryk besig om my doktorale tesis te finaliseer. Ek het haar eers laat in 2021 ontmoet. Ek het die polisie in kennis gestel om my telefoonrekords aan te vra om dit te bevestig,” het Hengari getuig.

Hy het verder verduidelik dat toe die beweerde verkragtingslagoffer se broer probeer het om die saak op te los, Hengari gesê het dit was nie moontlik nie, omdat die klaer 'n beëdigde verklaring afgelê het.

“Om die verklaring sonder meer terug te trek, was nie ’n opsie nie, aangesien sy aanklagte van meineed in die gesig kon staar vir jok onder eed. Boonop, aangesien die bewering die verkragting van ’n minderjarige behels het, is dit as ’n saak vir die staat beskou om te vervolg,” het hy getuig.

Sy medebeskuldigde, wat Maandag sonder verteenwoordiging verskyn het, is Woensdag deur die regsverteenwoordiger Nafimane Halweendo vergesel. Halweendo het bykomende tyd versoek om die hoofbewyse te hersien. Gevolglik is die saak uitgestel tot Maandag vir die staat en Halweendo se kruisondervraging.

Die aanklagte teen die twee mans sluit dwarsboming van die gereg, om op 'n korrupte wyse vergoeding aan te bied en die aanhitsing tot 'n misdryf. Dit volg op bewerings dat Hengari probeer het om 'n vrou wat hom van verkragting beskuldig het, om te koop deur haar in April N$220 000 aan te bied in ruil daarvoor dat sy die klagte terug trek. vir die terugtrekking van haar eise. - [email protected]