Harde slag vir Lühl-gesin

“Binnelandse sake was konsekwent in sy teistering van hierdie paartjie. In my opinie is dit betreurenswaardig en nie die soort ding wat ons verwag om te sien van ons hooggeregshof nie.”So het die Namibiër Phillip Lühl se regsverteenwoordiger, Uno Katjipuka, Maandag aan Republikein gesê.Lühl en die Meksikaan Guillermo Delgado, ’n selfdegeslag-egpaar, wat die afgelope jare in ’n regstryd gewikkel is om Namibiese burgerskap vir hul seun, Yona, te verkry, is Maandag ’n gevoelige slag toegedien toe die hooggeregshof beslis het dat hy nie op burgerskap geregtig is nie.Die hoërhof het in Oktober beslis dat Yona, wat in Suid-Afrika deur ’n surrogaatskap-ooreenkoms gebore is, burgerskap deur afkoms mag kry.Die minister van binnelandse sake, immigrasie, veiligheid en sekuriteit het egter teen dié uitspraak geappelleer en vyf regters van die hooggeregshof het beslis dat die hoërhof se uitspraak foutief was en het dit Maandag ingevolge ’n hofbevel tersyde gestel.Hoofregter Peter Shivute, adjunkhoofregter Petrus Damaseb en regters Sylvestor Mainga, David Smuts en Theo Frank het op 6 Maart die saak aangehoor en het Maandag hul uitspraak gelewer.“Siende dat die geboorte van die seun nie geregistreer is in terme van die Namibiese wet op burgerskap nie, was die hoërhof nie in die posisie om burgerskap toe te ken nie,” lui die uitspraak. Die regters het verder beslis dat die versuim om die geboorte in Namibië te registreer, genoeg rede is om Lühl se aansoek van die hand te wys. Die hof het daarom nie die weiering van die minister se teenaansoek – wat DNS-toetse van Lühl versoek het om vaderskap te bewys – hanteer nie.AGTERGRONDLühl en Delgado het ’n surrogaatskap-ooreenkoms met ’n Suid-Afrikaanse vrou aangegaan en ná die geboorte is ’n Suid-Afrikaanse geboortesertifikaat aan Yona uitgereik. Lühl en Delgado is as Yona se ouers op die geboortesertifikaat aangeteken. Hulle het daarna vir Yona na Namibië gebring en mettertyd aansoek gedoen om Namibiese burgerskap deur afkoms, maar die ministerie het die aansoek afgekeur.Lühl het aangevoer dat die minister die aansoek om burgerskap geweier het op grond van sy afkeur teenoor selfdegeslag-huwelike.Die minister het ’n DNS-toets van Lühl versoek om vas te stel of hy wel Yona se biologiese pa is en dit nie Delgado se spermselle was wat tot die bevrugting gelei het nie, aangesien Delgado nie ’n Namibiese burger is nie.Lühl het die saak in die hoërhof aanhangig gemaak en was suksesvol. Die minister se teenaansoek en versoek om DNS-toetse, is van die hand gewys.Die minister het teen die saak geappelleer en is aan die begin van die maand in die hooggeregshof aangehoor. Die betrokke vyf regters moes beslis of die hoërhof die regte uitspraak gelewer het toe die hof Lühl se minderjarige kind as ’n Namibiese burger verklaar het aangesien sy pa in Namibië gebore is, en of die minister se teenaansoek regmatig van die hand gewys is. Die appèl het geslaag en Yona is gevolglik burgerskap geweier. – republikein@republikein.com.na

Harde slag vir Lühl-gesin

Kommentaar

Republikein 2025-05-01

Meld asseblief aan om kommentaar te lewer

Harde slag vir Lühl-gesin

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie