‘Haar dood was net ’n kwessie van tyd’

Die gesin van ’n Swakopmundse vrou wat aan ’n pulmonêre embolisme gesterf het, het ’n regstryd teen Mediclinic Swakopmund en ’n dokter in die hoërhof in Windhoek verloor.Die vrou se man en twee dogters het aangevoer sy kon oorleef het as die pulmonêre embolisme, ’n lewensgevaarlike bloedklont wat na die longe beweeg, vroeër geïdentifiseer en behandel was.Regter Orben Sibeya het egter bevind dat die gesin nie daarin geslaag het om te bewys dat vroeëre diagnose en behandeling waarskynlik haar dood sou voorkom het nie.“Dit blyk, op grond van die getuienis, dat haar dood net ’n kwessie van tyd was,” het Sibeya bevind.Sy uitspraak is verlede Donderdag gelewer.Die regsgeding is in Julie 2021 aanhangig gemaak, drie jaar na die vrou se dood in Julie 2018.Haar man en twee dogters het Mediclinic Swakopmund en dr. Christoff Coetzee gedagvaar vir skadevergoeding wat voortspruit uit haar dood. Hulle het elk N$450 000 geëis – ’n gesamentlike N$1,35 miljoen – vir sielkundige skok, trauma, angs, stres, hartseer en emosionele verlies.In 2022 het die familie se mediese kenner, dr. Gregory Prominitz, getuig dat die vroeëre toediening van ’n teenstollingsmedikasie soos Clexane – ’n voorgeskrewe bloedverdunningsmedikasie om skadelike bloedklonte te verhoed of te behandel – die vrou ’n “vegkans” sou gegee het en haar kanse op oorlewing sou verhoog het.Die regter het egter bevind dat dit nie die oorsaaklike verband vasgestel het wat nodig is om die verweerders aanspreeklik te hou nie.Die hof het die regsoorsaak toegepas, wat vereis die familie moes bewys dat die vrou waarskynlik sou oorleef het as die beweerde versuim om die pulmonêre embolisme te diagnoseer en te behandel, nie plaasgevind het nie.‘TE LAAT’Afsonderlike mediese kenners het getuig dat die pulmonêre embolisme reeds aansienlik gevorder het voordat die vrou die hospitaal bereik het. Hulle het verduidelik dat heparien nie ’n bestaande bloedklont oplos nie en dat Clexane ten minste vier uur sou neem om effektief te word, terwyl sy baie vroeër gesterf het. Een het gesê ’n groot bloedklont het waarskynlik bloedvloei vanaf die regterkant van die hart geblokkeer wat hartversaking en ’n hartstilstand veroorsaak het.Sibeya het hul getuienis aanvaar en bevind haar dood was hoogs waarskynlik onvermydelik. Hy het ook die bewering verwerp dat vloeistowwe wat by die hospitaal toegedien is, haar toestand vererger het en opgemerk dat haar bloeddruk na die behandeling verbeter het.– rita@nmh-hub.com.na

‘Haar dood was net ’n kwessie van tyd’

Kommentaar

Republikein 2026-09-17

Meld asseblief aan om kommentaar te lewer

‘Haar dood was net ’n kwessie van tyd’

Kommentaar

Republikein 2026-09-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.