G’n borg vir Lüderitz-sakeman ná beweerde aanranding

Elizabeth //Kheibes – ’n Bekende sakeman van Lüderitz, Erasmus (Poenie) van Zyl, is gister borgtog geweier in die landdroshof op dié dorp nadat hy Maandag weer in hegtenis geneem is op ’n klag van fisieke geweld teen sy vrou en die oortreding van ’n beskermingsbevel.Die aanklagte teen Van Zyl sluit in aanranding met die doel om ernstig te beseer, saamgelees met die bepalings van die wet op gesinsgeweld. Van Zyl, wat Reichs Pharmacy op die kusdorp besit, is op 8 September vanjaar op sosialemediaplatforms deur sy vrou (wat anoniem wil bly) se suster daarvan beskuldig dat hy haar [sy vrou] uit hulle huis gesluit het en haar by verskeie geleenthede erg geslaan het.Tydens een van dié voorvalle is bene in haar regterpols glo gebreek.Die suster het glo besef iets skort toe Van Zyl se vrou tydens video-oproepe geweier het om haar gesig te wys.“Ek en my ma maak ’n punt daarvan om my suster te bel en ons het besef dat sy haar gesig weggesteek het in ’n video-oproep aan haar.“My suster het vir haar lewe gevrees en met die onlangse voorval wat daartoe gelei het dat haar regterpols geopereer moes word, het sy ons gesmeek om nie vir Van Zyl in te lig dat ons van die mishandeling weet nie. Sy het gesê: ‘Hy sal my doodmaak.’” So het die suster in ’n telefoniese onderhoud aan ons susterkoerant Namibian Sun gesê.Sê IETS Die waarnemende polisiebevelvoerder in die ||Kharasstreek, Godfried Kauhanda, het gesê hy is bekommerd oor die groot aantal voorvalle van gesinsgeweld wat agter geslote deure plaasvind en nie by die polisie in die streek aangemeld word nie.“Ja, hy [Van Zyl] is Maandag in hegtenis geneem op aanklag van geslagsgebaseerde geweld. Sy vrou het nog nooit enige geweld by die polisie aangemeld nie, dit is die eerste keer, ondanks bure se bevestiging van verskeie ander voorvalle. Ek weet regtig nie hoekom nie,” het hy gesê.Kauhanda het bygevoeg die polisie het uitgebreide ervaring met vroue wat “in stilte ly” en versuim om mishandeling aan te meld weens die vrees vir verlies aan finansiële sekuriteit.Van Zyl en die slagoffer is op 13 Januarie vanjaar getroud volgens haar suster, wat beklemtoon het dat Van Zyl beloftes van ’n “goeie lewe” aan die slagoffer gemaak het. Kort daarna het die mishandeling glo egter begin.“Hy het gesê hy het haar geslaan omdat sy nooit dissipline ontvang het nie. Hy paradeer bedags rond met Bybelgeskrifte en snags mishandel hy sy vrou. As my suster nie gepraat het toe sy het nie, sou ons haar verloor het aan die hande van daardie man,” het sy in trane gesê.Die staat, verteenwoordig deur Leonard Mateus, het Van Zyl se borgtogaansoek teengestaan en gesê hy glo die beskuldigde kan homself weer aan ’n soortgelyke misdryf skuldig maak en moontlik op die vlug slaan. Verder meen die staat hy word van ’n ernstige oortreding beskuldig en dit is nie in die openbare belang dat hy op borgtog vrygelaat word nie.Peru Liebenberg het as Van Zyl se regsverteenwoordiger opgetree. Die borgtogaansoek is deur landdros Mechtilde Shanghala aangehoor, wat die saak tot 20/21 September uitgestel het. – republikein@republikein.com.na

G’n borg vir Lüderitz-sakeman ná beweerde aanranding

Kommentaar

Republikein 2025-06-17

Meld asseblief aan om kommentaar te lewer

G’n borg vir Lüderitz-sakeman ná beweerde aanranding

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie