Gevangene se aanranding geregverdig, sê verweerders

“Die eiser [Marcus Thomas] is met minimum geweld geslaan en dit was wetlik geregverdig onder die omstandighede.”Dit is wat die ministerie van binnelandse sake, immigrasie, veiligheid en sekuriteit en die Namibiese Korrektiewe Dienste (NCS) in hul finale betoë beweer wat Sondag by die hoërhof in Windhoek ingedien is.Dit vorm deel van die siviele aksie waarin die Amerikaanse moordbeskuldigde, Marcus Thomas, N$1,1 miljoen in skadevergoeding eis nadat beamptes van die NCS by die Windhoek Sentrale Gevangenis (WCF) hom na bewering in 2017 aangerand het. “Die eiser [Thomas] is sedert sy opname by die WCF in 2011, ’n moeilike, onvoorspelbare en aggressiewe gevangene. Die owerhede, veral die sekuriteitsafdeling, het die eiser as ’n gevaarlike gevangene beskou.”Die verweerders, wat die ministerie, NCS en vyf beamptes van die NSC insluit, het verder in hul finale betoë uitgewys dat Thomas ook gepoog het om uit die geriewe te ontsnap.Hoewel Thomas aanvoer hy is nie dieselfde behandel nie omdat hy ’n Amerikaner is, voer die verweerders aan hy word gemonitor as gevolg van sy geskiedenis, aggressiewe houding, asook die bestuur se kommer dat hy weer wil ontsnap. AGTERGRONDThomas eis skadevergoeding teen die verweerders vir beweerde onregmatige beserings en skending van sy reg op waardigheid, beskerming teen marteling of wrede, onmenslike behandeling en diskriminasie.Hy voer aan dat hy op 13 Januarie 2017 ingeroep is na die kantoor van die destydse hoof van sekuriteit by WCF, Silas Matheus, nadat hy en ’n medegevangene baklei het. Hy beweer Matheus en ander lede van die NCS het hom daarna aangerand en met knuppels oraloor sy lyf geslaan.Die verweerders voer aan dat hulle ten tyde van die beweerde aanranding ’n probleem met onwettige smokkelary van verbode items in die geriewe ondervind het. Die tronkbewaarders het die selle deursoek wat volgens hulle wrywing tussen die gevangenes veroorsaak het. Gevangenes het mekaar na bewering blameer en dit het gelei tot ’n vlaag van onderonsies tussen die gevangenes.Die verweerders beweer Thomas en ’n medegevangene Reinhold Itembu het op 13 Januarie 2017 baklei en beide is na Matheus se kantoor geneem. Volgens die verweerders se weergawe van gebeure, het Thomas in die kantoor voortgegaan om Itembu aan te rand. Beamptes het na bewering ingegryp en probeer om Itembu uit Thomas se wurggreep te kry.“Fisieke geweld is uiteindelik gebruik. Die eiser is met &#039;n knuppel op die arms, skouers en rug geslaan.“Die geweld wat gebruik is, was redelik onder die omstandighede en het daartoe gelei dat Itembu losgekom het. Dit was nodig om Itembu teen fisieke besering en/of dood te beskerm.”Die verweerders voer verder aan dat dit slegs Matheus was wat Thomas geslaan het, terwyl Thomas beweer ’n groep beamptes het hom aangerand.WAS ITEMBU DAAR?Thomas verwerp dié weergawe van gebeure en voer aan dat Itembu nie tydens die aanranding in Matheus se kantoor was nie. Sy betooghoofde verwys na Itembu se getuienis dat hy buite die kantoor gestaan en glo gehoor het hoe Thomas geslaan word. Thomas het verder aangevoer dat hy ná die aanranding ’n klag gelê het en die dissiplinêre komitee het Matheus skuldig bevind op aanranding. Partye het Maandag en Dinsdag voor regter Hannelie Prinsloo verskyn. – kristien@republikein.com.na

Gevangene se aanranding geregverdig, sê verweerders

Kommentaar

Republikein 2026-11-03

Meld asseblief aan om kommentaar te lewer

Gevangene se aanranding geregverdig, sê verweerders

Kommentaar

Republikein 2026-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.