Gevangene glo kaal uitgetrek, aangerand

’n Gevangene by die Hardap korrektiewe dienste se geriewe op Mariental beweer owerhede het hom gedwing om sy klere uit te trek en voor ander personeel en gevangenes paddaspronge te doen.Hy beweer verder dat beamptes hul vingers in sy anus gedruk het.Fabianus Shekunyenge eis tans sowat N$1,88 miljoen in skadevergoeding van die minister van binnelandse sake, immigrasie, veiligheid en sekuriteit en die kommissaris-generaal van die Namibiese korrektiewe dienste. Volgens Shekunyenge se eisbesonderhede het beamptes in Desember 2021 na sy sel gegaan en hom beskuldig dat hy dagga by hom gehad het. Hy het dit ontken.“Nege beamptes het hom met geweld uit sy sel gestoot. Hulle het hom herhaaldelik in sy gesig en oor sy lyf geslaan en geskop. Hulle het ook knuppels gebruik.“Hulle het hom kaal uitgetrek en hom gedwing om paddaspronge te doen, te hurk en te spring. Daarna het hulle hul vingers in sy anus gedruk,” lui die eisbesonderhede.Shekunyenge beweer die beamptes het ook traangas of pepersproei in sy gesig en anus gespuit.Die aanranding het na bewering in ’n openbare kantoor en binne die sig van gevangenes en ander lede van die korrektiewe dienste plaasgevind.Shekunyenge beweer sy reg op liggaamlike en sielkundige integriteit, asook sy waardigheid is aangetas.KORREKTIEWE DIENSTE Die minister en kommissaris-generaal het reeds die hof in kennis gestel dat hulle die saak sal teenstaan, maar het nog nie hul pleitstukke ingedien nie.Die kommissaris-generaal van korrektiewe dienste in Namibië, komm. Raphael Hamunyela, het aan Republikein gesê wanneer beamptes vermoed iemand het ’n item in hul rektum gedruk, word die gevangene(s) vir X-strale hospitaal toe geneem en ’n dokter ondersoek hulle.“’n Beampte sal onder geen omstandighede sy vingers in ’n gevangene se anus druk nie. Slegs die uiterlike liggaam word deursoek.”Ten opsigte van die beweerde aanranding het Hamunyela gesê hy het nog nie die betrokke beamptes se weergawes gehoor nie en indien daar enige waarheid daarin steek, is dit ’n ernstige oortreding.BESERINGSShekunyenge het glo kneusplekke en wonde oraloor sy liggaam opgedoen en een van sy tande is as gevolg van die beweerde insident gebreek.Hy voer aan dat hy ook ernstige irritasies in sy oë, neus, mond en anus gehad het.Volgens sy eisbesonderhede, wat op 18 Januarie 2022 ingedien is, het hy vir vier maande ná die voorval gesukkel om te lê of te slaap.Hy beweer verder die beamptes het hom mediese behandeling geweier, wat verdere pyn, lyding en ongemak veroorsaak het.Shekunyenge eis N$1,875 miljoen in skadevergoeding vir onder meer die vernedering, skok, pyn, skending aan selfbeeld en uiterste ongemak wat hy glo moes verduur.Hamunyela het aan die koerant gesê talle sake van beweerde aanranding van gevangenes in korrektiewe geriewe word aanhangig gemaak.Die saak word deur regter Esi Schimming-Chase in die hoërhof in Windhoek aangehoor. – kristien@republikein.com.na

Gevangene glo kaal uitgetrek, aangerand

Kommentaar

Republikein 2026-09-18

Meld asseblief aan om kommentaar te lewer

Gevangene glo kaal uitgetrek, aangerand

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.