Gesloer met permitte los dokter sonder werk

Henriette Lamprecht“Dit is hartseer, ontmoedigend en inderdaad vernederend om ’n gekwalifiseerde, bekwame man te wees met 17 jaar ondervinding in die mediese veld, wat nou gereduseer is tot ’n bedelaar wat afhanklik van vriende en familielede vir aalmoese is.”’n Buitelandse dokter van Swakopmund wat sedert Februarie nie ’n inkomste kan verdien nie omdat sy werkspermit verval het, het in ’n dringende aansoek in die hoërhof gevra dat die hernuwing daarvan so gou as moontlik afgehandel moet word. Dr. Innocent Ngwarati woon sedert 2014 in die land en ’n hernuwing van sy aansoek vir ’n verblyfspermit is meer as ’n jaar gelede op 7 Mei goedgekeur, maar is nooit deur die voorsitter van die immigrasieraad uitgereik nie. Die dringende aansoek vra ook vir ’n interdik teen die hoof van immigrasie, die voorsitter van die immigrasie-verkiesingsraad, die raad asook die ministerie van binnelandse sake, immigrasie, veiligheid en sekuriteit wat hulle daarvan weerhou om hom en sy gesin uit die land te deporteer.Ngwarati sê in hofstukke die hofbevel moet die verkiesingsraad dwing om sy aansoek vir die hernuwing van sy werkspermit wat op 22 Februarie ontvang en geliasseer is, dringend te hanteer en af te handel. Ngwarati het op ’n vorige geleentheid ook ’n dringende hofaansoek gebring teen die voorsitter van die immigrasieraad omdat sy optrede onwettig is omdat hy geweier het om ’n permit uit te reik wat deur die verkiesingsraad goedgekeur is. Dié dringende aansoek is van die hand gewys omdat dit nie as dringend beskou is nie en Ngwarati eerder moet aansoek doen vir die hernuwing van sy werkspermit wat die betrokke respondente genoeg tyd sal gee om beweerde ongerymdhede met sy permanente verblyfspermit te ondersoek.In opdrag van sy regsverteenwoordigers het Ngwarati gevolglik op 22 Februarie vanjaar vir die hernuwing van sy werkspermit aansoek gedoen. Sedertdien het hy ten spyte van verskeie navrae deur hom en sy regsverteenwoordiger nog geen reaksie oor ’n besluit ontvang nie, wat op ’n duidelike versuim en of nalaat van die verkiesingsraad se amptelike en wetlike pligte is. Volgens sy verklaring is die verkiesingsraad onder ’n wetlike plig en verpligting om enige aansoek binne ’n redelike tyd en sonder enige vooroordeel teen die aansoeker af te handel.Ngwarati sê hy voldoen aan die wetlike vereistes aangesien die raad sedert 2014 sy werkspermitte uitgereik en hernu het totdat die laaste een op 22 Februarie vanjaar verval het. “Ek kan dus nie die verkiesingsraad se skielike ommeswaai en ongeregverdige en arbitrêre weiering en versuim verstaan om my aansoek vir hernuwing of verlenging van my werkspermit te hanteer en terselfdertyd hul blatante weiering om ’n permanente verblyfspermit uit te reik nie,” lui die verklaring. Ngwarati sê hy lei hieruit af dit is ’n poging om hom en sy familie “uit te put” totdat hulle hul regte opgee en Namibië verlaat. Die verkiesingsraad se optrede is volgens hom ook ’n “gruwelike oortreding” van sy grondwetlike reg vir administratiewe geregtigheid.Hy is die versekering gegee ’n ondersoek na beweerde ongerymdhede met sy verblyfspermit sou binne drie maande afgehandel wees, maar agt maande later is hy steeds in die duister. Ngwarati kon sedert Februarie ook nie sy beroep beoefen en enige inkomste vir hom en sy gesin genereer nie.Ngwarati sê omdat sy en sy gesin se paspoorte nie die nodige permitte in het nie, kan hulle nie buite Namibië of na Zimbabwe reis vir enige noodgevalle nie. Sy toegang tot bank- en gesondheidsdienste is ’n reuse-uitdaging, met sy bank wat dreig om sy rekeninge te sluit omdat sy immigrasiestatus in Namibië nie op datum is nie. Die huidige stand van sake het ’n “ondraaglike situasie in sy en sy gesin se lewe geskep”, omdat hulle nie vir die toekoms kan beplan nie. Die saak is tot 22 September uitgestel vir voorverhoorverrigtinge en die toekenning van ’n verhoordatum oor wie die koste vir die aansoek moet dra. – henriette@republikein.com.na

Gesloer met permitte los dokter sonder werk

Kommentaar

Republikein 2025-09-19

Meld asseblief aan om kommentaar te lewer

Gesloer met permitte los dokter sonder werk

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie