Geld vir kos, klere gebruik

Tuyeimo Haufiku – Een van die medebeskuldigdes in die beweerde Sanlam-versekeringsbedrogsaak waarby sowat N$1,3 miljoen betrokke is, sê ’n deel van die geld wat hy glo ontvang het, is gebruik om Kerskos vir sy ma en klere vir sy kinders te koop.

Festus Amwaalwa, ’n servikale kankerverpleër by die Onandjokwe-hospitaal het Maandag in die landdroshof op Ondangwa tydens sy borgtogverhoor getuig. 

Hy staan tereg op vier aanklagte van bedrog en korrupsie wat verband hou met ’n beweerde bedrieglike Sanlam-versekeringseis wat aan Klaudia Martin behoort.

Die beweerde bedrog is glo in 2020 deur Abner Mateus georkestreer. Mateus word ook daarvan beskuldig dat hy die meesterbrein agter die aanval op die beheeraanklaer Justine Shiweda in Oktober verlede jaar was. Shiweda is in Februarie vanjaar dood.

Mateus het Martin na bewering opdrag gegee om ’n siekte-eis by Sanlam in te dien deur gebruik te maak van gemanipuleerde mediese diagnostiese dokumente.

Die dokumente is glo deur Kelsey Kudumo geverifieer, ’n destydse leerlingdokter by die Onandjokwe-hospitaal.

Kudumo is aan Hella Mpinge voorgestel wat na bewering die eisdokumente na Amwaalwa gebring het.

Amwaalwa het getuig hy het N$35 000 ontvang as ’n teken van waardering vir die uitbetaling en vir “slegs” die fasilitering van die bekendstelling van mense aan mekaar.

Hy het aan die hof gesê N$100 000 is in sy suster se bankrekening gedeponeer. 

“Ek het die geld gebruik om my stukkende motor te herstel, klere vir my vier kinders te koop, vir my ma Kerskos te koop en om mahangulande in die nedersetting Oneputa en ook my eie lande in die Okankolo-kiesafdeling te ploeg. 

“Ek het ook materiaal vir ’n heining vir my grond gekoop,” het hy getuig.

Volgens Amwaalwa is hy ’n enkelpa van vier kinders wat tussen vier en tien jaar oud is. Die ma’s van sy kinders is almal werkloos en die kinders bly by sy ma, wat hy finansieel ondersteun.

Hy het getuig hy ondersteun ook weeskinders van sy familie wat op hom staatmaak om hul huur te betaal terwyl hulle aan instellings vir hoër onderrig studeer.

Hy het landdros Boraface Konga gevra om borgtog aan hom toe te staan. As ’n ingeskrewe verpleegstudent by die Universiteit van Namibië (Unam) se Oshakati-kampus, is hy volgens hom nie ’n gevaar vir die samelewing nie, maar eerder “’n waardevolle bate”.

Amwaalwa het aan Konga gesê dat hy onskuldig sal pleit sou die aanklaer-generaal besluit om hom te vervolg. Hy het getuig ’n gedeelte van die geld is onder ander individue versprei. Dit sluit in Kudumo wat glo N$20 000, Ottilie Johannes wat na bewering N$40 000 en Mpinge wat glo N$5 000 ontvang het. 

Volgens hom het hy sy suster N$2 000 aangebied omdat sy toegelaat het dat die geld in haar rekening gedeponeer word. Sy het egter glo geweier om vergoed te word.

Volgens Amwaalwa is die N$100 000 wat in sy suster se rekening gedeponeer is, glo deur Mpinge oorgeplaas. 

Mpinge, ’n skoonmaker by die Onandjokwe-hospitaal, is ook met Mateus verbind, maar is nie in verband met hierdie saak in hegtenis geneem nie.

Die staat word deur Erastus Kristiana verteenwoordig. Die borgtogverhoor duur voort met vyf ander beskuldigdes wat aansoek om borgtog doen. 

– [email protected]