FlyNamibia slaag in hofaansoek

Die hoërhof in Windhoek het gistermiddag die besluit van die Vervoerkommissie van Namibië, om nie FlyNamibia se lugvervoerlisensie te hernu nie, tersyde gestel.Indien die hof tot ’n ander beslissings sou gekom het, sou Namibië se enigste verskaffer van geskeduleerde lugdienste se lisensie op 28 Maart verval en hulle nie gemagtig sal wees om verdere dienste te lewer nie.Die hofuitspraak volg nadat FlyNamibia verlede week Dinsdag die hof genader het met ’n dringende aansoek teen die voorsitter van die Vervoerkommissie wat volgens hulle geweier het om dié lugdiens se lisensie te hernu.FlyNamibia se regsverteenwoordiger, adv. Raymond Heathcote, het Vrydag betoë voor regter Esi Schimming-Chase gelewer, terwyl niemand van die kommissie of die ministerie van werke en vervoer – wat as tweede respondent in die saak gelys is – verrigtinge bygewoon het nie. Die respondente het ook geen kennisgewing van voorneme om die saak teen te staan, ingedien nie.Ingevolge Schimming-Chase se bevel, sal FlyNamibia se hernuwingsaansoek terugverwys word na die Vervoerkommissie vir heroorweging.AANSOEK AFGEKEURFlyNamibia het ’n lugvervoerlisensie sedert 1995 en dit is in die verlede al vyf keer hernu, met die jongste hernuwing wat in Maart 2019 plaasgevind het.Hulle het volgens hofstukke ’n hernuwingsaansoek in November 2023 by die Vervoerkommissie ingedien en het in Februarie vanjaar ’n voorlegging voor die kommissie gedoen, maar die aansoek is op 8 Maart afgekeur.FlyNamibia beweer dat geen redes vir die afkeuring van die aansoek verskaf is nie en dat die besluitnemingsproses onreëlmatig was aangesien die ondervoorsitter van die kommissie, Loini Shikale, die voorlegging bygewoon het omdat die voorsitter, James Diedericks, siek was.Colin Henri van Schalkwyk, FlyNamiba se direkteur, het aangevoer dat Diedericks – wat die persoon was wat die finale besluit moes neem – eers ná die voorlegging ingelig is en nie daaraan deelgeneem het nie.‘’N KATASTROFIESE IMPAK’Hy het in hofstukke gesê as die maatskappy se lisensie verval en die hof nie die kommissaris se besluit tersyde stel nie, dit glo werknemers, passasiers en verskeie sektore van die land sou raak.“Die aansoeker (FlyNamibia) se hele besigheid sal tot stilstand kom indien die lisensie verval aangesien die wet dit verbied dat lugvervoerdienste sonder ’n lisensie gelewer word,” het Van Schalkwyk in hofstukke gesê.Verder het hy aangevoer dat die kommissie se besluit ’n impak sou hê op sowat N$174 miljoen se jaarlikse bydraes tot die land se ekonomie en dit sou na bewering sowat 87 mense sonder werk laat. – kristien@nmh-hub.com.na

FlyNamibia slaag in hofaansoek

Kommentaar

Republikein 2026-06-19

Meld asseblief aan om kommentaar te lewer

FlyNamibia slaag in hofaansoek

Kommentaar

Republikein 2026-06-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.