Fishrotters soek ander hofsaal

Hoewel die tralies by die hofsaal van die Windhoek Sentrale Gevangenis verwyder is, hou vier van die Fishrot-beskuldigdes vol met hul aansoek om na ’n ander hofsaal te skuif.“Die hok bestaan steeds al is dit sonder die metaal diefwering. Dis ’n hok, nie ’n beskuldigdebank nie,” beweer die voormalige minister van justisie, Sacky Shanghala, wat homself en drie van sy medebeskuldigdes in die saak verteenwoordig.Shanghala, Ricardo Gustavo, James Hatuikulipi en Pius Mwatulelo het die hofaansoek teen die kantoor van die regbank aanhangig gemaak. Hulle het die hofaansoek ingevolge afdeling 149 van die strafproseswet gebring en eis dat hulle na ’n ander hofsaal geskuif word.Die hoërhof in Windhoek lewer op 14 Februarie uitspraak oor die kwessie. Dit nadat uitspraak eintlik vandeesweek gelewer moes word, maar uitgestel is aangesien die uitspraak nie gereed was nie.Dit is een van talle aansoeke wat die Fishrot-bekuldigdes reeds in die hoërhof gebring het. Ander aansoeke sluit in ’n versoek dat die verhoor geskei word en sommige van die beskuldigdes apart van die ander verhoor word en aansoeke dat regter Moses Chinhengo – wat die Fishrot-hoofverhoor hanteer – van die saak verwyder word.‘REGTE GESKEND’Dis nie die eerste keer dat die Fishrot-beskuldigdes beswaar maak teen die omstandighede van die hofsaal waar hul verhoor en ander hofaansoeke aangehoor word nie. “Partye kon nie ’n ooreenkoms bereik om die dispuut te besleg nie. Dit is omdat die regeringsrespondente weier om ’n skikkingsooreenkoms te onderteken waarin hulle sal toegee dat ons fundamentele reg om met waardigheid behandel te word, geskend is, asook ons reg om onskuldig geag te word totdat andersins bevind word,” lui die Fishrotters se hofstukke.Hulle voer aan die verwydering van die tralies neem nie weg van die feit dat hulle vanaf 20 September 2022 tot 16 Spetember 2024 agter die tralies moes sit nie. Hulle voer ook aan daar is ander probleme met die betrokke hofsaal.“Die verwydering van die diefwering los nie die ander tekortkominge soos die gebrek aan lessenaars (werkspasie), kragpunte en sitplekke met rugleunings op nie.”Hulle voer aan die foto’s wat geneem is terwyl hulle agter die tralies gesit het, het hul reg op waardigheid geskend.“Wat gebeur het, het gebeur. Dat ons regte geskend is, is ’n feit. Regeringsrespondente weier om selfs hierdie feit te aanvaar en te erken. “Wat hulle eerder gedoen het, is om die tralies in die geheim te verwyder. Wat ’n toegewing is en spreek dade harder as woorde,” meen Shanghala in hofstukke wat in Desember by die hof ingedien is.Die Fishrot-beskuldigdes voer verder aan dat hierdie saak verreikende gevolge vir die staat se regstelsel sal inhou.“Veral oor die manier waarop persone behandel word wat voor die howe in hofsale moet verskyn wat nie voldoen aan die voorskrifte met betrekking tot respek vir waardigheid en die versekering van ’n regverdige verhoor nie. “Hulle voldoen nie aan die minimum standaarde wat verwag word ingevolge die Namibiese Grondwet nie,” beweer hulle.Die Fishrot-beskuldigdes het ook gekla oor die voertuig waarin hulle en die vyf ander beskuldigdes na die hof vervoer word. Dit is glo agter op ’n bakkie en sommige van hulle ervaar gesondheidskwale wat na bewering vererger wanneer hulle so vervoer word.Daar is tien Fishrot-beskuldigdes, naamlik Gustavo, Shanghala, Mwatulelo, James Hatuikulipi, Tamson Hatuikulipi, Mike Nghipunya, Bernard Esau, Phillipus Mwapopi, Otneel Shuudifonya en Nigel van Wyk. Die meerderheid is reeds sedert November 2020 in aanhouding by die Windhoek Sentrale Gevangenis en die enigste beskuldigde wat tans op borgtog is, is Van Wyk.– kristien@nmh-hub.com.na

Fishrotters soek ander hofsaal

Kommentaar

Republikein 2025-12-16

Meld asseblief aan om kommentaar te lewer

Fishrotters soek ander hofsaal

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.