Familie ruk op teen borgtog vir pa

Die familie van wyle Felix Musongo (31) wat na bewering deur sy pa tydens ’n huishoudelike rusie in Kavango-Wes doodgeskiet is, sal môre betogings op Rundu en Nkurenkuru hou en die owerhede daarvan beskuldig dat hulle die familie van belangrike hofverrigtinge uitgesluit het wat tot die beskuldigde se vrylating op borgtog gelei het.Die beplande betogings kom ’n nadat Markus Max Musongo (69), ’n Rooms-Katolieke diaken aangekla is van die moord op sy seun, borgtog toegestaan is ondanks die familie se besware en toenemende kommer oor hoe die saak hanteer is.Namens die familie het Felix se suster, Alisa Musongo, aan Network Media Hub (NMH) gesê dat familielede eers van die borgtogverhoor te wete gekom het nadat die hof reeds sy beslissing gemaak het.“Ons het eers later daardie selfde aand uitgevind dat borgtog toegestaan is. Ons is nooit vooraf ingelig nie en tot vandag toe het ons nie redes ontvang wat verduidelik waarom borgtog toegestaan is nie,” het sy gesê.Volgens Alisa strek die familie se frustrasie verder as die borgtogbeslissing self en spruit dit uit wat hulle beskryf as ’n reeks kommunikasiefoute en prosedurele kwessies sedert die saak die eerste keer die hofstelsel betree het.Sy het beweer dat familielede herhaaldelik gesukkel het om inligting oor hofverskynings, uitstellings van en veranderinge van howe te bekom.“Daar was verskeie geleenthede waar ons óf nie ingelig is nie óf eers op die nippertjie inligting ontvang het. As familie probeer ons die saak volg, maar dit was baie moeilik,” het sy gesê.Die familie beweer verder dat nóg familielede van die oorledene nóg sleutelrolspelers wat by die ondersoek betrokke is, oor die borgtogverrigtinge ingelig is.Alisa het beweer dat die ondersoekbeampte nie teenwoordig was toe die aansoek aangehoor is nie en dat die aanklaer wat oorspronklik aan die saak toegewys is, deur ’n ander aanklaer verteenwoordig is. Hierdie bewerings kon nie onmiddellik onafhanklik bevestig word nie.“Hoe kan ’n besluit van daardie aard geneem word wanneer die familie van die oorledene nie eens ingelig is nie?” het sy gevra.Sy het gesê die betogings is bedoel om aanspreeklikheid en groter deursigtigheid in die hantering van die saak te eis.“Ons is nie tevrede met hoe hierdie saak hanteer is nie. Dit voel asof die oorledene se familie nie in ag geneem word nie,” het sy bygevoeg.Die saak spruit uit ’n noodlottige skietvoorval by die Siudiva-nedersetting in die Kavango-Wesstreek in Oktober 2024.Volgens hofrekords het die moordbeskuldigde na bewering sy seun tydens ’n huishoudelike rusie doodgeskiet voordat hy die voorval by die owerhede aangemeld het.Die beskuldigde het langer as ’n jaar in aanhouding gebly voordat borgtog van N$5 000 in Mei vanjaar toegestaan is.As deel van sy borgtogvoorwaardes is hy beveel om nie na Siudiva terug te keer nie, om op sy plaas naby Bravo te woon, gereeld by die polisie aan te meld, in die Rundu-distrik te bly en nie met getuies of die voortgesette ondersoek in te meng.Terwyl die moordsaak steeds voor die howe is, sê die Musongo-familie dat môre se betogings daarop gemik is om groter deursigtigheid en aanspreeklikheid te verseker in ’n kwessie wat steeds aansienlike openbare belangstelling in die Kavangostreke trek.– eliot@nmh-hub.com.na

Familie ruk op teen borgtog vir pa

Kommentaar

Republikein 2026-06-16

Meld asseblief aan om kommentaar te lewer

Familie ruk op teen borgtog vir pa

Kommentaar

Republikein 2026-06-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.