Familie emosioneel ná vonnis

Die families van die oudpolisieman Morgan Brian Plaatjie (46) en sy oorlede eksmeisie, Yvette Louw, was in trane toe regter Dinnah Usiku hom gister tot 25 jaar tronkstraf gevonnis het.Plaatjie het Louw sowat drie jaar gelede verskeie kere op haar arms, bors, rug en nek met ’n mes gesteek. Dit is ten spyte van die feit dat sy voor haar dood verskeie beskermingsbevele teen hom gehad het.Tydens hofverrigtinge voor die vonnisoplegging het Louw se stiefpa, Henry Nicolas, aan die hof gesê dat Plaatjie se gedrag van mishandeling bekend was onder familie en kollegas. Louw het glo voortdurende huishoudelike geweld verduur.Plaatjie was voorheen ’n speurder verbonde aan die polisie se eenheid teen geslagsgebaseerde geweld en is gister in die hoërhof in Windhoek gevonnis.Nicolas het ná die vonnisoplegging sy ontevredenheid oor die vonnis uitgespreek wat volgens hom te lig is. Hy meen dat Plaatjies steeds ná die 25 jaar, jonk genoeg sal wees om voort te gaan met sy lewe.Volgens &#039;n sielkundige se verslag, het Plaatjie en Louw se verhouding baie stryery bevat wat hoofsaaklik gefokus het op die vaderskap van hulle dogter.“Die beskuldigde [Plaatjie] was verpletter deur die nuus wat hy van &#039;n sekere vrou ontvang het dat hul dogter nie syne is nie,” lui die hofstukke.WREED AANGEVALPlaatjies het in die aand van 25 Junie 2021 onverwags by Louw se erf opgedaag terwyl sy en haar lewensmaat buite die huis gesit het. Hy het hulle aangeval en albei verskeie kere met ’n mes gesteek. Louw se lewensmaat het daarin geslaag om van die toneel te vlug. Plaatjie het egter sy geweldadige aanranding op Louw voortgesit.Sy het in die huis ingehardloop en haarself in die huis toegesluit, maar Plaatjie het die deur afgebreek en aangehou om haar te steek. Nadat Louw haarself teëgesit het, het sy uiteindelik inmekaargesak.Plaatjie het die polisie gebel en hulle versoek om haar hospitaal toe te neem. Haar 14-jarige dogter en agtjarige seun woon sedert haar moord by familielede.VONNISOPLEGGINGPlaatjies is skuldig bevind op ses klagte wat insluit moord, aanranding, die opsetlike beskadiging van eiendom en die oortreding van beskermingsbevele.Op die klag van moord is hy tot 22 jaar tronkstraf gevonnis. Hy is ’n bykomende drie jaar tronkstraf opgelê vir aanranding met die doel om ernstig te beseer.Op die ander klagte is hy tot altesaam drie-en-’n-half jaar tronkstraf gevonnis wat gelyktydig uitgedien sal word met die 25-jaarvonnisse vir die moord- en aanrandingsklagte.– republikein@republikein.com.na

Familie emosioneel ná vonnis

Kommentaar

Republikein 2025-11-03

Meld asseblief aan om kommentaar te lewer

Familie emosioneel ná vonnis

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.