Eis oor naald in liggaam betwis

Die ministerie van gesondheid en maatskaplike dienste het amptelik aanspreeklikheid in regsgeding van N$1,55 miljoen ontken wat deur ’n 53-jarige Windhoekse vrou ingestel is.

Sy het beweer dat ’n chirurgiese naald tydens bevalling in 2002 in haar liggaam agtergebly het.

Vir 22 jaar het die vrou na bewering met onverklaarbare pyn en herhalende infeksies saamgeleef, asook die aanhoudende gevoel gehad dat iets binne-in haar liggaam nie reg is nie.

In die verweerskrif wat in Januarie by die hoërhof ingedien is, betwis die ministerie die bewerings van die vrou se eis. Die regsgeding is verlede September ingestel.

Die ministerie voer egter aan daar is geen mediese rekord wat toon dat die eiseres op 1 Junie 2002 by die Okakarara-staatshospitaal in kraam aangemeld het of dat sy later na die Otjiwarongo-staatshospitaal oorgeplaas is nie.

Dit hou verder vol dat die vrou versuim het om enige spesifieke werknemer te identifiseer wat vir die beweerde nalatigheid verantwoordelik was.

Die ministerie beweer ook dit is medies onwaarskynlik dat ’n keisersnee tot ’n perineale skeur sou lei en ewe onwaarskynlik dat simptome van ’n vreemde voorwerp eers ses jaar ná die beweerde prosedure sou manifesteer en dan weer nege jaar later.

Volgens die verweerskrif was die vrou se simptome meer in ooreenstemming met vaginale afskeidingsindroom (VDS) of seksueel oordraagbare infeksies, wat die ministerie sê dikwels op grond van dié simptome behandel word.

Terwyl die ministerie erken dat ’n voorwerp uiteindelik ná ’n verwysing gevind is, ontken dit dat die voorwerp afkomstig van ’n keisersnee was wat deur sy mediese personeel uitgevoer is. Die ministerie verwerp dus bewerings van nalatigheid en aanspreeklikheid.

Die saak is na regter Beatrix de Jager vir bemiddeling verwys en op die hofrol vir 11 Maart geplaas.

JARE VAN PYN EN TRAUMA

Eers in 2024 het dokters die oorsaak van haar langdurige pyn vasgestel. Hofstukke verklaar dat ’n ginekoloog by Katutura-staatshospitaal die naald twee jaar gelede tydens verdere ondersoeke opgespoor en verwyder het.

Die regsgeding beweer dat sy ná haar hospitaalverblyf herhaaldelik pyn ervaar het en by verskeie gesondheidsgeriewe van die staat hulp gesoek het, insluitend die Robert Mugabe-kliniek en die gesondheidsentrums van Khomasdal en Katutura, maar dat die oorsaak ’n raaisel gebly het.

– [email protected]