Drie steekwonde glo 'mediese span' se skuld

‘n Man wat daarvan beskuldig word dat hy sy meisie en ma van sy drie kinders met ‘n skêr doodgesteek het, sê hy vertrou nie die staat se deskundige getuie wat sê sy het ses steekwonde gehad nie. Rodney Afrikaner het voor hoërhofregter Claudia Claassen verskyn oor die voorval in 2019 in die Hakahana-nedersetting in Windhoek. Afrikaner beweer toe hy in hegtenis geneem is nadat hy na bewering Petricia Hochobes met ‘n skêr gesteek het, het paramedici gesê daar was net drie steekwonde op haar regterbeen. Tydens kruisondervraging het Afrikaner die toelaatbaarheid bevraagteken van die nadoodse ondersoek wat in die hof voorgelê is.“Sover dit my betref, word ek daarvan beskuldig dat ek net drie steekwonde toegedien het. Waar het die ander drie vandaan gekom?”, was sy vraag aan die deskundige getuie, dr. Simasiku Kabanje. Afrikaner het Kabanje en sy mediese span wat die nadoodse ondersoek bygewoon en die verslag oor Hochobes se liggaam opgestel het, daarvan beskuldig dat hulle die bykomende drie steekwonde toegedien het. In reaksie hierop het Kabanje verduidelik dat die mediese toerusting wat gebruik word om die diepte en omvang van die wonde te bepaal, nie skerp is nie. “Ons gebruik toerusting soos tange wat stomp is. Dus is hierdie aantyging nie moontlik nie,” het hy verduidelik. Volgens Kabanje het die outopsie gewys dat die dodelike steekwond 6 cm diep was en deur die bobeenspiere beweeg het.Hochobes het ten tye van haar dood 54 kg geweeg.“Haar interne organe was bleek wat aandui dat sy ‘n beduidende hoeveelheid bloed verloor het en uiteindelik doodgebloei het,” het Kabanje gesê.‘n Staatsgetuie het oor die noodlottige aand getuig Afrikaner en Hochobes was in ‘n hewige argument gewikkel. Volgens die getuie het Afrikaner die oorledene geklap, voordat hy ‘n skêr uit ‘n kis in die kamer gehaal het. Hochobes was besig om die paartjie se baba van sewe maande te borsvoed, toe Afrikaner haar in die bobeen met die skêr gesteek het. - republikein@republikein.com.na

Drie steekwonde glo 'mediese span' se skuld

Kommentaar

Republikein 2026-08-04

Meld asseblief aan om kommentaar te lewer

Drie steekwonde glo 'mediese span' se skuld

Kommentaar

Republikein 2026-08-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.