Dokter sny 'vrou se derms raak'

’n Vrou wat verlede jaar in ’n staatshospitaal in Windhoek opgeneem is om ’n sist op haar eierstokke te laat verwyder, moes later verneem die dokter wat die operasie uitgevoer het, het na bewering haar derms beskadig.Vemuinapi Tjapaka (34) dagvaar nou die ministerie van gesondheid en maatskaplike dienste vir N$2 miljoen vir mediese nalatigheid. Dit nadat sy drie maande in die Katutura-staatshospitaal moes deurbring vir ’n maaginfeksie wat haar afhanklik van haar familie vir hulp gelaat het. Sy kon ook nie haar finale eksamens skryf nie. Tjapaka is eers van die infeksie ingelig toe sy na bewering vir ure lank desperaat om hulp gepleit het, nadat sy erge maagpyne gekry het kort nadat die sist verwyder is. Volgens haar beëdigde verklaring wat by die hoërhof in Windhoek ingedien is, is sy op 24 April verlede jaar in die staatshospitaal opgeneem vir die operasie wat deur dr. Romelio Ramon de la Paz uitgevoer sou word. Laasgenoemde is ’n spesialis-verloskundige en ginekoloog. Die oggend ná haar operasie het Tjapaka erge maagpyn ontwikkel. Luidens die hofdokumente het sy na bewering die verpleegsters aan diens hieroor ingelig, maar hulle het haar glo nie gehelp nie. Die verpleegsters het glo haar bekommernisse as niks afgemaak en na bewering gesê sy “soek bloot aandag”.Nadat sy na bewering ure in pyn deurgebring het, het ’n mansdokter aan diens uiteindelik na haar omgesien. Hy het Tjapaka glo ingelig dat sy ’n maaginfeksie ontwikkel het weens afval wat uit haar spysverteringstelsel gelek het. Volgens Tjapaka is dit veroorsaak toe De La Paz haar derms raakgesny het. Sy moes gevolglik 'n bykomende chirurgiese prosedure ondergaan om die infeksie skoon te maak. TRAUMATIESTjapaka het aan hoërhofregter Orben Sibeya erken haar lewe het drasties verander weens die traumatiese ervaring. Sy moes vier operasies ondergaan om die infeksie te behandel en kan nou weens erge rugpyne nie vir lang tye sit, staan of op haar rug lê nie. As gevolg hiervan sê sy het sy haar finale eksamens misgeloop en kon sy nie met haar studies voortgaan nie. Sy het ook vir haarself gewerk en het ’n suksesvolle besigheid gehad en ’n inkomste van N$42 000 verloor.Volgens Tjapaka is sy nou van die ondersteuning van vriende en familie afhanklik. Die saak was Donderdag in die hof vir voorverhoorverrigtinge. – rita@nmh-hub.com.na

Dokter sny 'vrou se derms raak'

Kommentaar

Republikein 2025-12-19

Meld asseblief aan om kommentaar te lewer

Dokter sny 'vrou se derms raak'

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.