Derde borgtoguitstel ‘onsensitief’

Senior lede van Namibië se regbank kon die afgelope naweek Noorde toe reis om die begrafnis van die vermoorde aanklaer Justine Shiweda by te woon – selfs terwyl die landdros wat aangewys is om ’n deurslaggewende borgtogbeslissing in haar beweerde moordenaar se saak te lewer, vir die derde keer nie kon reis nie weens onbetaalde toelaes. Die kontras het openbare frustrasie verder aangeblaas ná nóg ’n uitstel in die borgtogaansoek van die mediese dokter Fillemon (Fly) Nakanduungile, wat saam met vyf ander ’n aanklag van moord en ander klagte in verband met Shiweda se dood in die gesig staar. Die opeenvolgende vertragings is as ‘onsensitief’ bestempel, veral teenoor die familie van die oorledene, wat telkens hof toe kom om die borgtoguitspraak aan te hoor. Die borgtogbeslissing is Maandagoggend weer nie in die Ondangwa-landdroshof gelewer nie, wat die derde agtereenvolgende uitstel beteken. Network Media Hub verneem dat, soos met die vorige vertragings, die voorsittende landdros Mutwa Billy Lutaka nie van Otjiwarongo kon reis nie, omdat sy daaglikse (DSA) en sy verblyf- en reistoelae (S&amp;T) nie betaal is nie. Assistent-landdros Cornelius Haipumbu, ’n hoofklerk van die hof wat die administratiewe uitstel hanteer het, het die hof ingelig dat Lutaka telefonies laat weet het hy wag steeds op betaling van die kantoor van die regbank voordat hy na Ondangwa sal reis. Daar word verder verstaan dat Lutaka ook nog nie ’n aanstellingsbrief van die landdroste-kommissie ontvang het wat hom magtig om die saak buite sy regsjurisdiksie te behartig nie. Sy aanstelling in Januarie – nadat al die landdroste van Ondangwa hulself onttrek het – het intussen verval en moet hernu word. Intussen sluit diegene wat Noorde toe gereis het vir Shiweda se begrafnis in die Oshanastreek, onder meer hoofregter Peter Shivute, die adjunkvoorsitter van die landdroste-kommissie Hilma Kuduva en die adjunkhooflanddros Kandiwapa Nembia in. ’n Bron na aan die saak het bevraagteken of reistoelaes vir senior regbankamptenare verwerk is terwyl Lutaka se S&amp;T-eise om die saak te kan verhoor – ’n saak wat die land geskok het – steeds uitstaande bly. “Dit is ’n ernstige saak. Justine se familie en vriende het nou drie keer hof toe gekom en ’n beslissing verwag, net om met leë hande weg te gaan,” het die bron gesê. Staatsaanklaer Yeukai Kangira het Maandag aan die hof gesê die staat is gereed om die borgtogbeslissing aan te hoor. Die herhaalde uitstelle wek ook kommer binne die Namibiese polisie, wat Nakanduungile van Grootfontein, waar hy aangehou word, na Ondangwa en terug moet vervoer elke keer wanneer die saak op die rol is. “Dit is duur om die beskuldigde elke keer te verskuif, net dat hy weer teruggestuur word,” het ’n amptenaar gesê. 'NONCHALANT’“Dit is ’n ernstige nasionale saak, tog lyk dit of dit nonchalant hanteer word.” Die uitvoerende direkteur van die kantoor van die regbank, Benhardt Kukuri, het geweier om direk kommentaar te lewer oor die spesifieke omstandighede rondom Lutaka se onvermoë om te reis om uitspraak in die borgtogaansoek te lewer. In plaas daarvan het Kukuri die algemene prosedure uiteengesit wat gevolg word wanneer S&amp;T vertraag of nie betyds verwerk word nie. Hy het verduidelik dat waar S&amp;T-betalings nie afgehandel is nie, die regbank alternatiewe reëlings tref deur ’n staatsvoertuig en ’n bestuurder beskikbaar te stel om die landdros te vervoer. “As S&amp;T nie gereed is nie, gee ons ’n staatsmotor en ’n -bestuurder om jou daarheen te neem. Dit is dan vir die landdros om te besluit of hy daardie aanbod aanvaar,” het Kukuri gesê. Hy het bygevoeg dat verblyfkwessies soms opduik wanneer toelaes nie vooraf betaal word nie. “Ek het ’n gevoel ons het ’n motor aangebied om hom daarheen te neem en hy het waarskynlik gekies om sy S&amp;T te vat, want as dit nie betaal is nie, sal daar verblyfprobleme wees,” het Kukuri gesê. Hy het verder opgemerk dat die regbank jaarliks beduidende hulpbronne toeken om die landdroste wat moet reis te fasiliteer, veral in sake waar regbeamptes hulself onttrek. “Ons toekenning vir landdroste landswyd is aansienlik. Ons het sowat N$8 miljoen bestee om landdroste rond te skuif waar ander hulself onttrek het,” het hy gesê. Terwyl hy uitdagings rakende S&amp;T-betalings erken het, het Kukuri gesê die regbank is in gesprek met die ministerie van finansies om die saak aan te spreek. “Dit is nie reg as daar geen verblyf is nie. Ons werk saam met die tesourie om die probleem uit te sorteer. Vir daardie spesifieke een gaan ek vir eers geen kommentaar lewer nie.” Hy het bygevoeg dat die situasie binnekort opgelos sal word. “Ons hoop teen die 26ste sal die situasie reggestel wees en hy sal kan reis en die uitspraak lewer,” het Kukuri gesê.Die borgtogverhoor is tot 26 Februarie uitgestel. – tuyeimo@nmh-hub.com.na

Derde borgtoguitstel ‘onsensitief’

Kommentaar

Republikein 2026-03-26

Meld asseblief aan om kommentaar te lewer

Derde borgtoguitstel ‘onsensitief’

Kommentaar

Republikein 2026-03-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.