De Klerk vandag weer in SA hof

Ellanie Smit – Die Namibiese voortvlugtige Marén de Klerk, wat vroeër vanjaar sy naam na Michael verander het, sal vandag hoor of hy op borgtog vrygelaat gaan word. De Klerk se aansoek om borgtog het gister in die Paarl-landdroshof voortgegaan met die staat wat borgtog teenstaan. Die staat argumenteer as borgtog toegestaan word, kan dit die Fishrot-verhoor – wat op 23 Oktober in Namibië begin – vertraag.De Klerk doen aansoek om borgtog nadat hy op 1 Junie in Paarl in Suid-Afrika in hegtenis geneem is te midde van pogings om hom aan Namibië uit te lewer waar hy in die Fishrot-sage vervolging in die gesig staar. Hy word in Namibië gesoek, waar hy aangekla word van bedrog, geldwassery en rampokkery wat met die Fishrot-skandaal verband hou.Die staat het borgtog teengestaan op grond daarvan dat ’n uitleweringsversoek van Namibië in Januarie 2023 ontvang is, die erns van die misdrywe en die swaar strawwe wat opgelê kan word, De Klerk wat moontlik langtermyn-gevangenisstraf in die gesig staar, hy ’n vlugrisiko is en dat hy waarskynlik sy uitleweringsverhoor sal ontduik as hy op borgtog vrygelaat word.Die staat – wat deur advokaat Marésa Engelbrecht verteenwoordig word – het in hul betooghoofde gesê dit is ook waarskynlik dat De Klerk die doelwitte of die behoorlike funksionering van die strafregstelsel insluitend die borgtogstelsel sal ondermyn of in gevaar stel. Verder het sy opgemerk dat Interpol sedert Februarie verlede jaar na hom soek en hy ’n voortvlugtige van die gereg is.“Hy het geweet daar was ’n ondersoek teen hom in Namibië aan die gang toe hy landuit is.”Engelbrecht het gesê De Klerk het ook geweier om homself aan die polisie oor te gee, selfs nadat hy gehoor het dat Interpol na hom soek. Sy het opgemerk dat hy in Januarie vanjaar sy naam na Michael verander het en baie rondbeweeg het en nie lank op een plek bly nie, wat dalk van die redes kan wees waarom Interpol hom nie kon vind nie. Sy het gesê sy rede vir die naamsverandering was om veiligheidsredes.“Ek stel aan die hof dat hy nie eerlik is oor die werklike rede waarom hy sy naam verander het nie. Ek voer aan dat hy arrestasie ontduik het,” het Engelbrecht gesê. Sy het verder gesê De Klerk is nie ’n fluitjieblaser nie, maar ’n voortvlugtige van die gereg. In ’n beëdigde verklaring wat deur die ondersoekbeampte van Interpol oor die uitlewering ingedien is, het kaptein WJ van der Heever ook beklemtoon dat hy ’n vlugrisiko is. Van der Heever het opgemerk dat De Klerk twee paspoorte het, een vir Namibië en een vir Suid-Afrika.“Hy word deur Namibiese owerhede gesoek en ’n lasbrief is uitgereik vir sy inhegtenisneming en hy het op alle relevante en wesenlike tye geweet die Namibiese owerhede soek hom en dus is hy ’n voortvlugtige van die gereg.”Van der Heever het gesê hy twyfel nie dat De Klerk na ’n land sal vlug wat nie ’n uitleweringsooreenkoms met Namibië het nie. Hy het gesê inligting wys dat De Klerk van een adres na ’n volgende beweeg het, wat dit moeilik gemaak het om hom te vind.“Ons soek hom sedert Februarie 2022 toe die lasbrief vir sy inhegtenisneming deur die landdros in die Paarl onderteken is. Hy het geen vaste werk nie en is gesond en kan dus maklik reis.”Van der Heever het bygevoeg dat die saak teen De Klerk in Namibië sterk is en vir hom ’n aansporing is om verhoor te ontduik.“As hy op borgtog vrygelaat word, sal hy waarskynlik sy onwettige aktiwiteite hervat.” – republikein@republikein.com.na

De Klerk vandag weer in SA hof

Kommentaar

Republikein 2026-02-03

Meld asseblief aan om kommentaar te lewer

De Klerk vandag weer in SA hof

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.