Cosdef-baas agter tralies vir bedrog

Die waarnemende hoof van die stigting vir die ontwikkeling van vaardighede in gemeenskappe (Cosdef) Martin Nandu Mubita word in Mei gevonnis, nadat hy skuldig bevind is aan bedrog van meer as N$700 000. Mubita is tot en met sy vonnis in aanhouding in die polisieselle in Rundu. Mubita het die bedrog gepleeg tydens sy tyd by die destydse Kavango-streeksraad. Klagtes van korrupsie en geldwassery is teen hom laat vaar om duplisering te voorkom. Cosdef bestuur die ontwikkelingsentrums vir gemeenskapsvaardighede (Cosdecs) oraloor in Namibië en spesifiek in Luderitz, Gobabis, Otjiwarongo, Swakopmund, Tsumeb, Ondangwa, Opuwo en Rundu. Die Cosdef-ondersteuningseenheid was in Swakopmund gebaseer en dit was van hier waar Mubita, net bekend as Martin Nandu, die organisasie volgens werknemers "soos sy eie besigheid"bestuur het. Hy is op 28 Februarie verlede jaar as die waarnemende uitvoerende hoof aangewys, nadat hy vir meer as vyf jaar die bestuurder vir menslike hulpbronne en finansies was. Ontevrede werknemers het reeds &#039;n klagte oor sy beweerde korrupsie en wanbestuur by Cosdef in Januarie aan die Teenkorrupsiekommissie (ACC) gestuur, maar volgens hulle het daar dadels van gekom. In &#039;n verklaring wat aan die ACC voorgelê is, beweer een van die werknemers die organisasie was vir &#039;n lang tyd die teelaarde vir korrupsie en die misbruik van openbare hulpbronne vir persoonlike gewin. Cosdef is in 1998 gestig en geregistreer as &#039;n trust onder die ministerie vir hoër onderrig en met die voormalige minister Nahas Angula as voorsitter en Justin Ellis, Paulus Kapia, Len le Roux en Albertina Heita as raadslede. Dit word maandelilks gefinasier deur onder meer die ministerie, die Namibiese finansiële hulpfonds vir studente (NSFAF) en die Namibiese Opleidingsowerheid (NTA). Die verklaring wat aan die ACC voorgelê is, verwys onder meer na &#039;n oorplasing van N$9,5 miljoen in Oktober 2022 van NSFAF en bykomende maandelikse betalings van N$2,5 miljoen aan Cosdef. Dit terwyl salarisse in Januarie en Februarie verlede jaar nie betaal kon word sonder om spaargeld te gebruik nie. Werknemers beweer ook miljoene word in &#039;n beleggingsrekening by Bank Windhoek gehou in weerwil van die feit dat die nie-winsgewende organisasie nie geregtig is op so &#039;n rekening nie. Die verklaring verwys as na ongerymdhede met aanstellings, sowel as die misbruik van reis- en verblyftoelaes asook toelaes vir voertuie en petrol. Mubita het glo ook nuwe iPhone&#039;s gehad met &#039;n waarde van N$20 000 wat hy twee keer per jaar vir homself gekoop het. Dit ten spyte van die feit dat senior bestuur se jaarlikse drempel hiervoor N$5 500 is.Hy het onder meer ook diensverskaffers aan Cosdef lukraak aangestel. Die verklaring verwys na &#039;n rekening van &#039;n maatskappy in Oshakati wat Cosdef jaarliks N$800 000 gekos het vir opleiding vir sy rekenkundige stelsel. Toerusting en hulpbronne wat aan sentrums geskenk is, het glo dikwels verdwyn. Angula het by navraag gesê toe Mubita aangestel is, het niemand vir &#039;n polisieklaringsertifikaat gevra nie en was hulle nie bewus van enige hangende klagte teen hom nie. Volgens hom moet geregtigheid nou sy gang gaan. Hy was onbewus van enige korrupsie of wanbestuur by Cosdef en sê die stigting se boeke word jaarliks geoudit. "Soms is die ouditverslae laat, maar ons is gewoond daaraan om met openbare fondse te werk. Enige vermoede van bedrog is nie onder die raad se aandag gebring nie," het hy gesê. Met verwysing na die tekort aan toerusting vir studente, het Angula gesê dit is nie die eerste keer wat die stigting "dié tipe krisis met administrasie en bestuur" moet oorleef nie. "Ons sal koppe bymekaar sit. Moenie bekommerd wees nie, ons sal dit uitsorteer." - republikein@republikein.com.na

Cosdef-baas agter tralies vir bedrog

Kommentaar

Republikein 2025-11-05

Meld asseblief aan om kommentaar te lewer

Cosdef-baas agter tralies vir bedrog

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.