Buitelandse kliënt sleep Beefcor hof toe

’n Plaaslike vleisverskaffer staar ’n regsgeding van N$2,4 miljoen van een van sy buitelandse kliënte in die gesig nadat ontbeende beesvleissnitte na bewering met salmonella besmet was voor dit uitgevoer is.Beefcor Meat Suppliers en die GPS Food Group, wat in die Verenigde Koninkryk gebaseer is, het in Oktober 2021 ’n skriftelike ooreenkoms aangegaan vir die uitvoer en verskaffing van premium ontbeende Namibiese beesvleissnitte aan óf die Europese Unie (EU) óf Noorweë.GPS Food het in sy eisbesonderhede beweer dat Beefcor dié ooreenkoms verbreek het deur beesvleisprodukte wat met salmonella besmet was en nie meer geskik was vir menslike gebruik nie, uit te voer en te verkoop. Die maatskappy het ook beweer dat Beefcor versuim het om hom ten volle te vergoed vir die verliese wat hy gely het as gevolg van kontrakbreuk.Beefcor is glo in Mei verlede jaar ingelig van die positiewe uitslag van die salmonella-toets met betrekking tot sy vleisprodukte.“Hulle het mondelings en/of stilswyend (by wyse van hul optrede) aanspreeklikheid erken en, in ooreenstemming met klousule 3.5.3 van die skriftelike ooreenkoms, ingestem om die eiser [GPS Food] vir ’n gedeelte van sy verliese te vergoed”, lui die hofstukke.GPS Food het die saak in Januarie vanjaar by die hoërhof in Windhoek aanhangig gemaak en beweer dat Beefcor geweier het, ondanks sy eise, om N$2 379 258 te betaal wat steeds uitstaande was. TOETSEBeefcor het na bewering die betrokke beesvleisprodukte in Februarie 2022 na die buiteland uitgevoer, wat Noorweë teen einde Mei 2022 bereik het. Die produkte is daarna aan sy kliënte in Noorweë gelewer, soos in die ooreenkoms uiteengesit is.Die Noorse voedselowerhede en laboratoriums het gevolglik salmonella-toetse uitgevoer op monsters wat uit die produkte versamel is om die kwaliteit van die produk te bepaal.Luidens hofstukke sou “die produkte twee keer salmonellatoetse ondergaan het, wat deur beide die Europese en Noorse voedselowerhede, sowel as owerhede in Namibië uitgevoer is”.In Februarie 2023 het die verseëlde Beefcor-produkte, wat toe al ’n jaar oud was, in die besit van ’n maatskappy genaamd FreshFood AS positief vir salmonella getoets. Daarna, in Maart van dieselfde jaar, het beesvleisprodukte wat by ’n ander maatskappy gestoor is, ook positief vir salmonella getoets.GPS Food beweer dat aangesien die produkte verseël was, daar geen kans op kruisbesmetting was nie. Die maatskappy het verder beweer dat die beesvleisprodukte met salmonella besmet was voor dit Namibië verlaat het.GPS Food het in Mei 2023 opdrag gegee dat die produkte vernietig of teruggestuur moet word na ’n nie-Europese Unie-staat.Partye het op 29 April in die hof verskyn en die saak is tot 3 Junie uitgestel. – republikein@republikein.com.na

Buitelandse kliënt sleep Beefcor hof toe

Kommentaar

Republikein 2025-05-01

Meld asseblief aan om kommentaar te lewer

Buitelandse kliënt sleep Beefcor hof toe

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie