Brockerhoff borgtog geweier

Boere, lede van die Namibië Landbou-unie (NLU), die Rehoboth Livestock Crime Organisation (RLCO), buurtwagte en die Namibiese polisie (Nampol) het gister na die landdroshof in Windhoek opgeruk in ’n gesamentlike poging om te keer dat ’n gewoontemisdadiger en veroordeelde wildstroper borgtog toegestaan word. Landdros Monica Andjaba het borgtog aan die 47-jarige Derick Brockerhoff en sy medebeskuldigde Markus Rooinasie (27) geweier. Sy het die saak tot 17 Mei uitgestel. Brockerhoff het aangedui dat hy van ’n private regsverteenwoordiger gebruik sal maak en Rooinasie sal vir regshulp aansoek doen.Beide verskyn op ’n klag van die onwettige jag van jagbare wild nadat ’n bekende buurtwaglid en sekuriteitsbeampte hulle verlede Donderdag met ’n gemsbok- en koedoekarkas en ’n Remington-jaggeweer in die berge agter Windhoek se Eros-woonbuurt betrap het. Staatsaanklaer Amize Adams het beide se borgtog heftig teengestaan en aangevoer dat Brockerhoff tans sewe hangende sake – wat wissel van veediefstal tot wildstropery – teen hom aanhangig het. Die sake strek oor gebiede vanaf oos na wes oor verskeie streke van die land. Volgens Adams is Brockerhoff in onderskeidelik 2016 en 2023 reeds skuldig bevind aan oortredings van onwettige jag en daar is nog lasbriewe vir inhegtenisname teen hom uitstaande.KOKAïENSMOKKELARY Die oudhoof van Nampol se dwelmeenheid, die afgetrede kommissaris Hermie van Zyl, was ook by die hof teenwoordig en het bevestig hy het vir Brockerhoff by Arandis in die Erongostreek in verband met kokaïensmokkelary in hegtenis geneem. Van die saak het ook dadels gekom. Frikkie de Lange van die plaas Glynberg in die noordelike Khomas-Hochland het aan Namibia Media Holdings (NMH) gesê Brockerhoff het in 2017 vyf osse op sy plaas geslag, die saak word telkemale uitgestel en is sedertdien hangend. “Brockerhoff is in 2017 hegtenis geneem, maar is drie dae later weer op borgtog vrygelaat. Die voertuig is gekonfiskeer, maar dit was ’n geleende voertuig wat weer aan die eienaar terugbesorg is,” het De Lange gesê. Volgens die boere Uwe en Max Trumper het Brockerhoff drie dragtige koeie op hul plaas by Seeis, oos van Windhoek, geslag. Die voorsitter van die Windhoek Streeklandbou-unie, Hennie Brisley, was die sameroeper van die rolspelers om ’n gesamentlike front by die hof te vorm. “In die Mariental-distrik alleen lê daar sewe dossiere van Brockerhoff en hy het glo vyf sebras in die Namib-Naukluft onwettig gejag. Sy broer, die bekende prokureur Trevor Brockerhoff, kry hom elke keer los,” het Brisley gesê. Hy beskou hierdie saak as ’n deurbraaksaak en hoop dat misdadigers sal sien dat misdaad nie ’n winsgewende bedryf is nie. Brisley sê boere kry reeds swaar weens die droogte en kan nie nog veediefstal en wildstropery ook bekostig nie. Hy versoek alle lede van boereverenigings wat wild- en veediestalsake teen die beskuldigde het, om hom of die polisie te kontak. – francoise@nmh.com.na

Brockerhoff borgtog geweier

Kommentaar

Republikein 2026-02-03

Meld asseblief aan om kommentaar te lewer

Brockerhoff borgtog geweier

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.