Boulter verwerp bewerings dat hy wil vlug

Die Britse sakeman en moordbeskuldigde, Harvey Boulter, het probeer om toenemende kritiek op sosiale media te demp oor bewerings dat hy na die buiteland wil reis terwyl hy op sy verhoor wag.

Hy dring daarop aan dat hy nie aansoek gedoen het om Namibië te verlaat nie en “bereikbaar” sou bly indien ’n hof uiteindelik sy borgtogvoorwaardes wysig. 

In ’n onderhoud met Republikein verlede week het Boulter gesê enige toekomstige internasionale reise sou slegs deur ’n formele proses plaasvind wat deur die hof goedgekeur en onder streng voorwaardes plaasvind. 

“Ek het nie aansoek gedoen vir toestemming om na die Demokratiese Republikiek die Kongo (DRK) te reis nie,” het hy gesê. 

“Wat ek deur my regspan oorweeg is of my borgtogvoorwaardes gewysig kan word om beperkte internasionale sakereise op ’n geval-tot-geval-basis toe te laat, onderhewig aan behoorlike goedkeuring en waarborge.” 

Boulter het beklemtoon dat hy nie die onvoorwaardelike teruggee van sy paspoort soek nie. 

“Ek het nie gevra dat my paspoort onvoorwaardelik teruggegee word nie. Enige voorgestelde wysiging sou nie ’n algemene verslapping wees nie. Dit sou ’n gestruktureerde proses wees waar ek die ondersoekbeampte vooraf van volledige reisbesonderhede sou voorsien, insluitend die bestemming, datums, duur, vervoermiddel, kaartjies en waar ek gaan bly.” 

Hy het bygevoeg: “Ek sal bereikbaar bly en sal bereid wees om indien vereis bevestiging via video vanaf die plek te doen.” 

Die sakeman het gesê sy bestaande borgtogvoorwaardes laat hom reeds toe om buite Windhoek te reis met toestemming van die ondersoekbeampte en dat hy al meer as vyf jaar aan daardie voorwaardes voldoen. 

“Ek verstaan ten volle die kwessie oor vlugrisiko, maar ek het geen bedoeling om die verhoor te ontduik nie,” het Boulter benadruk. 

“Ek wag al lank dat hierdie saak verhoor of andersins afgehandel word en ek hoop daardie proses sal nou binne die volgende jaar vorder.” 

Hy het volgehou dat hy van plan is om homself in die hof te verdedig. 

“Ek glo ek het ’n sterk verdediging op grond van die feite, wat ek mettertyd aan die hof sal voorlê. Ek wil verhoor word en my naam in ere herstel.” 

Boulter se opmerkings volg op wydverspreide kritiek op sosiale media nadat bewerings na vore gekom het dat sy regspan ’n aansoek oorweeg om sy borgvoorwaardes te wysig om beperkte internasionale sakereise toe te laat. 

Sy strafsaak spruit uit die noodlottige skietvoorval van sy plaasbestuurder, Gerhard van Wyk, op Boulter se plaas Kaross naby Kamanjab in Februarie 2021. 

Boulter staan tereg op ’n aanklag van moord sowel as vuurwapenverwante oortredings. Die staat beweer hy het Van Wyk opsetlik geskiet, terwyl Boulter volhou dat die vuurwapen tydens ’n struweling afgegaan het. 

Verlede jaar het die hooggeregshof die aanklaer-generaal se beslissing om Boulter te vervolg, bekragtig nadat dit sy appèl teen ’n vroeëre beslissing van die hoërhof van die hand gewys het. 

Waarnemende appèlregter Theo Frank het bevind daar is voldoende bewyse om redelike vooruitsigte op ’n skuldigbevinding te bied en het beslis dat die aanklaer-generaal se beslissing om die moordbeskuldigde te vervolg, nie irrasioneel of onredelik was nie. 

In ’n afsonderlike uitspraak van die hoërhof in 2024 het regter Herman Oosthuizen eweneens beslis dat die aanklaer-generaal se beslissing om Boulter te vervolg rasioneel was en bevind dat die staat die nodige redelike en waarskynlike gronde gehad het om met die strafsaak voort te gaan. Die strafverhoor bly hangende voor die hoërhof in Windhoek.

Boulter se regsprobleme strek oor beide straf- en siviele howe in Namibië.

Wyle Van Wyk se vrou Alta, dogter Michelle, seun Gerhard en skoondogter Liani het ’n siviele regsgeding teen Boulter en sy maatskappy, SX Investments One, aanhangig gemaak en eis meer as N$84 miljoen in skadevergoeding vir die verlies aan ondersteuning en inkomste. Dié saak se statusverhoor sal op 13 Julie in die hoërhof in Windhoek voortduur.

– [email protected]