Bock vir 15 jaar tronk toe

Johannes Bock (21) is gister deur hoërhofregter Claudia Claasen tot 18 jaar gevangenisstraf gevonnis vir die moord op die 17-jarige Sara Jonker op Gochas in die Hardapstreek drie jaar gelede.

Drie jaar van die vonnis is vir vyf jaar opgeskort op voorwaarde dat Bock nie gedurende die opskortingstydperk skuldig bevind word aan moord of strafbare manslag waarby aanranding betrokke is nie.

Die regter het verduidelik dat Bock die moord gepleeg het toe hy nog nie volle emosionele volwassenheid en oordeel bereik het nie, veral in sy hantering van konflik. 

“Die wet behandel ’n jeugdige oortreder nie op dieselfde wyse as ’n volwasse oortreder nie.”

Die staat het aanvanklik die hof versoek om vir Bock 30 jaar gevangenisstraf op te lê en aangevoer dat die aard van huishoudelike geweld van sy meisie se dood ’n streng vonnis vereis. 

NOODLOTTIGE DAG

Bock was 19 toe hy Jonkers vermoor het en het skuldig gepleit aan moord op grond van dolus eventualis — wat beteken hy het die moontlikheid voorsien dat sy optrede haar dood kon veroorsaak, maar tog voortgegaan het.

Die hof het tydens die verhoor aangehoor dat beide Bock en Jonkers op die dag van die voorval alkohol gedrink het toe hulle in ’n argument betrokke geraak het.

Jonkers het glo vir Bock aan sy klere aan die bors gegryp en geweier om te los, ondanks dat hy haar gevra het om hom te laat gaan.

Bock het kwaad geword en haar verwurg. Sy is aan versmoring oorlede.

Claasen het gesê Bock was nie so dronk dat hy nie geweet het wat hy doen nie, terwyl Jonkers se daad om sy klere vas te gryp nie die ernstige reaksie van verwurging geregverdig het nie.

GROOTWORDJARE

Jonkers, het sy gesê, was net 17 en het gehelp by haar oupa se huis nadat haar ouma gesterf het. Sy het die meeste van die huishoudelike take verrig, wat ná haar dood ’n aansienlike leemte in haar oupa se huis gelaat het.

Claasen het gesê die feit dat die moord nie vooraf beplan was nie, het nie die wreedheid daarvan verminder nie. 

“Al was dit nie ’n vooraf beplande daad nie, doen dit geen afbreuk aan die wreedheid van die daad nie.”

Die hof het ook van Jonkers se moeilike kinderjare gehoor.

Haar oom, Peter Jonkers, het getuig toe sy twee jaar oud was, is sy in die sorg van haar grootouers gelaat. Sy moes later skool in graad 6 verlaat, omdat haar oupa nie ’n skooluniform kon bekostig nie.

Haar oom het aan die hof gesê Jonkers se pa was grootliks afwesig in haar lewe en dat haar ma met alkoholverslawing gesukkel het en van los werk afhanklik was.

Die hof het ook Bock se grootwordjare in ag geneem.

Bock het getuig dat hy in erge armoede grootgeword het, met geen van sy ouers wat vaste werk gehad het nie. As kind het hy saam met sy pa gereis op soek na los werk op omliggende plase.

Omdat sy ouers geen geld gehad het nie en daar geen vervoer van die plase af was nie, het hy in sy hele lewe net een maand skool bygewoon.

Hy het later los werk op ’n plaas gedoen en tussen 2021 en 2022 gehelp om heinings op te rig. Hy het ook byna ’n jaar in aanhouding voor die verhoor deurgebring.

Bock het aan die hof gesê hy betreur dit diep dat hy Jonkers vermoor het en verstaan die gevolge van sy dade.

Hy het gesê hy het persoonlik by Jonkers se oupa om verskoning gevra, hoewel ander familielede nie sy verskonings aanvaar het nie.

Hy het ook aan die hof gesê hy het ná die voorval opgehou om alkohol te drink en beskou die ervaring as ’n lewensveranderende les.

BEROU

Claasen het bevind dat Bock se berou opreg is. Sy het gesê sy is tevrede dat hy die aanspreeklikheid van sy optrede verstaan en dat sy skuldbelydenis ’n poging verteenwoordig om verantwoordelikheid te neem vir wat hy gedoen het.

– [email protected]