Belastingaftrekking van N$33 m. skok Chinese firma

Jemima Beukes - ’n Chinese konstruksiemaatskappy het die hoërhof genader om die Namibië Inkomste-agentskap (NamRA) te beveel om sy besluit om N$33 miljoen in uitstaande belasting van die maatskappy se bankrekening af te trek, om te keer.Die maatskappy, wat glo op sy laaste bene is, het NamRA van privaatheidskending beskuldig en gesê die agentskap gebruik “apartheidagtige” beleide deur die uitstaande belasting direk vanaf die bank in te vorder. Zhong Mei Engineering Group (Edms) Bpk, verteenwoordig deur Sisa Namandje, het aan die hof gesê NamRA het hulle gedwing om ’n vergadering op 23 Junie onder die dreigement van sanksies teen hulle by te woon, waar hulle ondervra is.In sy funderende verklaring het die besturende direkteur, Jiang Chong Yuan, gesê hulle het NamRA ingelig dat hulle dokumente, insluitend belastingfakture, verlore geraak het weens ’n dispuut met hul vorige rekenmeestersfirma.Yuan wil hê die hof moet kennis neem dat hulle nie eens beswaar gemaak het teen ’n “indringende” besoek deur ”ongemagtigde” NamRa-agente aan die perseel nie en het ook ’n vergadering bygewoon wat op kort kennisgewing op 7 Julie vanjaar belê is. “Vier dokumente is aan ons voorgelê wat as ’n kennisgewing van assessering voorgehou is, wat aangedui het dat die totale en gekombineerde belasting betaalbaar ten opsigte van inkomstebelasting ’n netto bedrag van N$33 031 543 is. “NamRa se werknemers het in daardie vergadering geëis dat die bedrag wat na bewering in die bogenoemde dokumente verskuldig is, onmiddellik betaal moet word.“Ons was onvoorbereid vir so ’n vergadering. Ons het NamRa se amptenare ingelig dat die maatskappy nie so ’n bedrag onmiddellik of in die nabye toekoms sal kan betaal nie. Ons het voorgestel om ’n bedrag van hoogstens N$2 miljoen te betaal en reëlings te tref om die res te betaal terwyl ons besware teen die beweerde assessering gemaak het,” het Yuan gesê.NamRA se personeel het glo gesê hulle sal op hierdie versoek reageer en reëlings tref dat die res van die bedrag in paaiemente betaal word. Die vergadering is met dié verstandhouding afgesluit, net sodat Zhong Mei vyf dae later op 12 Julie besef het dat N$33 miljoen uit sy rekening geneem is. Yuan het bygevoeg hulle het ook ’n kennisgewing van hierdie aftrekking van Standard Bank Namibia ontvang, wat aandui dat die bank onder opdrag van NamRA as ’n agent ingevolge die wet opgetree het. ’n Bedrag van N$33 031 543 is glo aan die Bank of Namibia (BoN) oorbetaal op aandrang van NamRA.Yuan het bygevoeg NamRA het nie in ag geneem dat so ’n aftrekking tot die ineenstorting van die maatskappy kan lei nie, en dat die maatskappy wetlike verpligtinge het om betalings aan verskeie derde partye in die volgende paar dae te maak.Hy het ook ’n dringende versoek aan die hoërhof gerig om in ag te neem dat Zhong Mei onlangs ’n appèlsaak in die hooggeregshof verloor het waarin hy ’n bedrag van N$4 miljoen moet betaal en, as gevolg van NamRa se aftrekking, sal hy nie hierdie geld, insluitend regskoste, kan betaal nie. AGTERGROND Zhong Mei Engineering werk sedert 2015 aan verskeie grootskaalse staatsprojekte, soos die opgradering van die Rundu-abattoir, konstruksie van die distrikspad van Oshakati na Ongenga, die bou van koshuisblokke by die Universiteit van Namibië (Unam) se Neudamm-kampus en die tweede konstruksiefase van die ministerie van visserye en mariene hulpbronne se nuwe hoofkantoor.Die maatskappy het ook aan die Swakopmund-Hentiesbaai- en Uis-paaie gewerk en opgegradeer, asook die bou van die Oshoopala-brug oor die Okatanarivier in Oshakati. Die nuwe dubbelbaanpad vanaf Windhoek na die Internasionale Lughawe Hosea Kutako tel ook onder sy projekte.NIE DIE GEVALNamRA se hoof, kommissaris Sam Shivute, het die Zhong Mei Engineering se klagtes van die hand gewys en gesê hulle het totale bates van N$160 miljoen in Namibië en ’n skamele N$33 miljoen, wat in elk geval aan betaalbare belasting verskuldig is, sal nie tot die maatskappy se ineenstorting lei nie.“Die applikant kan nie skade ly wat voortspruit uit sy eie doen en late nie – dit is die versuim om verpligte belasting te betaal. Die applikant het kennis gedra van die verskuldigde belasting vir die jare onder oorsig wat hy nie aan die fiskus oorbetaal het nie. “Die applikant kan nie sê hy sal skade ly nie omdat die meer as N$33 miljoen weens die fiskus eers vir sy bedryfsverpligtinge aangewend moet word pleks van tot voordeel van die openbare belang nie,” het Shivute gesê.Hy het ook daarop gewys dat die maatskappy nie ontken dat hy enigsins aanspreeklik is om belasting te betaal nie en eerder voorgestel het om dit in paaiemente af te betaal en dat hulle behoorlik ingelig is dat hierdie voorstel van die hand gewys is.NamRA sê sy oudits toon dat die maatskappy geen opbrengste, geen uitgawes en geen inkomste aangeteken het toe hy sy belastingopgawes vir 2013 tot 2022 ingedien het nie.“Dit was so al het die belastingbetaler aktief sake gedoen wat inkomste van byna N$1 miljard vanaf 2013 tot 2018 gegenereer het. Die maatskappy het ’n aftrekking vir onder andere vermaak, boetes en geskenke in sy finansiële state geëis. Verder het die maatskappy aftrekkings van salarisse, lone en personeelwelsyn vir die 2013-’14-boekjaar geëis toe die maatskappy nie vir belasting geregistreer was nie.” – republikein@republikein.com.na

Belastingaftrekking van N$33 m. skok Chinese firma

Kommentaar

Republikein 2025-11-04

Meld asseblief aan om kommentaar te lewer

Belastingaftrekking van N$33 m. skok Chinese firma

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.