Bekken glo tydens kraam gebreek

Die ministerie van gesondheid en maatskaplike kwessies ontken beweringe van mediese nalatigheid in ’n hofeis waarin ’n vrou beweer dat haar linkerheup ontwrig en haar bekken gebreek het tydens die geboorte van haar kind in 2019.Whitney Snyder het in 2022 ’n hofsaak by die hoërhof in Windhoek teen die gesondheidsministerie en die regering aanhangig gemaak en eis N$1,5 miljoen in skadevergoeding. Die voorval het glo by die Otjiwarongo-staatshospitaal plaasgevind.Snyders was 19 jaar oud ten tye van die geboorte van haar kind en was destyds gediagnoseer met symphysis pubis diastasis, ’n toestand waar die skaambene geskei word.Hoewel die ministerie in hul pleitstukke erken dat Snyders met symphysis pubis diastasis gediagnoseer is en dat sy tydens geboorte ’n tweedegraadse perineale skeur ervaar het, betwis hulle die res van die inhoud van Snyders se eisbesonderhede."Die sorg van die mediese personeel het nie onder die vereiste standaard geval nie. Die mediese komplikasies was onverwags en die seldsame komplikasies [symphysis pubis diastasis] kon nie voorsien word deur die personeel wat die eiser behandel en versorg het nie," lui die ministerie se pleitstukke.Hulle het ook erken dat Snyders ná die geboorte van haar kind oorgeplaas is na ’n hospitaal in Windhoek vir verdere behandeling. Snyders beweer hier is x-strale van haar geneem wat gewys het haar bekken is gebreek. Sy het daarna glo ’n ses uur lange operasie ondergaan om ’n ysterplaat en vier skroewe te kry om die gebreekte bekkenbeen te stabiliseer en te herstel.GLO AANGERANDSnyders voer verder aan dat die mediese personeel, veral die verpleegsters, nalatig was omdat hulle haar nie behoorlik ondersoek het en vasgestel het dat sy nie natuurlik kan geboorte gee sonder om die risiko te loop om haar bekkenbeen te breek en haar linkerheup te ontwrig nie. Boonop beweer sy dat hulle haar fisies en verbaal aangerand het deur haar deur die gesig te klap en beledigende taal teenoor haar gebruik het.Sy beweer sy kan nie natuurlik kraam ná die voorval nie, ervaar pyn wanneer sy vir lang tye op haar sy slaap en ervaar ongemak wanneer sy vir lang tye staan of sit.&#039;NIE SAAMGEWERK&#039;Biti Phaka is ’n Kongolese mediese dokter wat in Otjiwarongo woon en werk. Phaka was aan diens toe Snyders geboorte gegee het en het ’n verklaring by die hof ingedien. “Ek is omstreeks 20:30 tot 21:00 deur die verpleegster na die kraamsaal ontbied, wat beweer het Snyder werk nie saam met die verpleegsters nie,” het sy verduidelik en bygevoeg dat sy nie ingelig is oor enige risiko&#039;s of komplikasies rakende Snyder se gesondheid nie. Toe sy in die kraamkamer kom, het sy by Snyder gepleit om saam te werk en beklemtoon dat dit noodsaaklik is vir die suksesvolle geboorte van haar kind. Snyder het gehoor gegee."Sy het geskree en haar bene saamgetrek, maar ons het haar so goed as moontlik ondersteun. Haar kind is uiteindelik gebore, met vaginale en anale skeuring met minimale bloeding. Ek het die verpleegsters gelos om daaraan aandag te gee," het die dokter verduidelik.Volgens die dokter het die verpleegsters haar, kort nadat sy weg is, teruggeroep en gesê dat die steke nie die bloeding stop nie. Sy het glo terug na die kamer gehardloop om te help en het besef dat die skeur groot was en tot by haar bekkenholte gestrek het. Snyders was wel op daardie stadium stabiel en het goed gekommunikeer.Die dokter het gesê dat sy en haar span verpleegsters nie die ontwrigting van die pelvis kon opspoor nie, aangesien Snyder normaal en suksesvol geboorte gegee het aan ’n gesonde baba.NOG ’N EIS TEEN DIE HOSPITAALDit is nie die eerste keer wat die staatshospitaal op Otjiwarongo by ’n hofgeding betrek is nie. Yvonne Pollmann en haar man, Jacques, dagvaar ook die ministerie en twee dokters van dié hospitaal vir N$4 miljoen.Pollman beweer dat sy in 2022 vir 12 ure moes wag voor ’n noodkeisersnee uitgevoer is, ten spyte van verskeie versoeke vir ’n noodkeisersnee en erge pyn wat sy verduur het. Sy voer aan dat haar baba in haar buik versmoor het en as gevolg hiervan doodgebore is. Die ondraaglike pyn wat Pollmann ervaar het, het na bewering daartoe gelei dat haar ongebore baba mekonium vrygestel het. Mekonium is ’n baba se eerste ontlasting, en is taai, dik en donkergroen en bestaan uit selle, proteïene, vette en dermafskeidings soos gal. Pollmann beweer in haar verklaring dat die verlengde tydperk van die aanvanklike diagnose dat haar baba in nood was weens die vrystelling van mekonium totdat die noodkeisersnee uiteindelik uitgevoer is, daartoe gelei het dat haar baba doodgebore is.Sy eis ’n miljoen elk vir emosionele skok en trauma, ongerief en ook toekomstige mediese uitgawes wat verband hou met sielkundige berading om die dood van haar baba te verwerk.– republikein@republikein.com.na

Bekken glo tydens kraam gebreek

Kommentaar

Republikein 2026-02-03

Meld asseblief aan om kommentaar te lewer

Bekken glo tydens kraam gebreek

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.