Bekende 'kruiedokter' vas vir poging tot moord, ontvoering

Die bekende 'kruiedokter' Kennedy Thiongo Kasume (42), alom bekend as “dr. Andrew”, is gister borgtog geweier nadat hy in hegtenis geneem is op aanklagte van poging tot moord, ontvoering en dwarsboming van die gereg.Hy het in die Oshakati-landdroshof verskyn, waar die saak tot 6 Oktober vir verdere ondersoek uitgestel is.Volgens die polisie se bevelvoerder in die Oshanastreek, komm. Naftal Lungameni Sakaria, hou dit verband met ’n voorval op Donderdag 1 Mei wat tussen 16:00 en 18:00 by die Makalani Real Estate-huise agter die Ongwediva-minimark plaasgevind het.Sakaria het gesê Kasume het na bewering sy 28-jarige huismaat, Nahum Teofelus Shanyengadje, in die linkerbobeen en -hand geskiet.“Die verdagte het die slagoffer uit hul huis geneem en hom opdrag gegee om sy selfoon af te skakel en vir niemand te sê waar hy is of wat gebeur het nie. “Hy het die slagoffer toe na ’n private dokter geneem sonder om die voorval by die polisie aan te meld,” het Sakaria gesê.Die onderonsie tussen die verdagte en Shanyengadje het na bewering ná ’n misverstand ontstaan.“Shanyengadje het op 1 Mei na hul huis teruggekeer met ’n voertuig om na ’n nuwe huureenheid te trek. Nadat hy vir die verdagte gesê het hy trek uit, het ’n argument uitgebreek. “Die verdagte het na bewering die slagoffer met sy vuis op die mond geslaan, ’n wapen uitgeruk en Shanyengadje daarmee teen die kop geslaan en ’n skoot in die muur afgevuur. “’n Tweede skoot het hom in die linkerbobeen getref. Aangesien sy linkerhand in sy broek se sak was, is sy wys- en middelvinger ook deur dieselfde koeël beseer,” het Sakaria verduidelik. Die slagoffer het glo gepleit om vrygelaat te word, maar Kasume het volgens die polisie geweier.In plaas daarvan het hy self noodhulp toegepas en die beseerde man na die Elim-gebied in die Omusatistreek geneem waar hy hom vir etlike dae aangehou het. “In dié tyd het die verdagte die slagoffer na ’n private dokter geneem en Shanyengadje opdrag gegee om te sê hy het homself geskiet.“Die verdagte het hom later na Ondjongulume geneem waar die slagoffer uiteindelik daarin kon slaag om te ontsnap. Hy het na Oshakati gegaan en sy familielede ingelig.” Volgens Sakaria is Shanyengadje in diens van die verdagte. Die polisie het ’n gebruikte patroondoppie op die toneel gevind wat as bewysstuk in die saak sal dien. Daar is ook beslag gelê op ’n swart Glock-pistool wat na bewering tydens die voorval gebruik is.Shanyengadje ontvang tans behandeling by die staatshospitaal op Oshakati, waar sy wonde glo tekens van infeksie toon. Sy toestand is egter stabiel.– republikein@republikein.com.na

Bekende 'kruiedokter' vas vir poging tot moord, ontvoering

Kommentaar

Republikein 2025-11-04

Meld asseblief aan om kommentaar te lewer

Bekende 'kruiedokter' vas vir poging tot moord, ontvoering

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.