B1 City-saak: Drie vra om kwytskelding

Enige misdrywe wat Kelly Nghixulifwa in sy posisie as RCC-hoof vir selfverryking kon gepleeg het, sou plaasgevind het voor die relevante deel van die Teenkorrupsiewet van krag was.So het die oud-RCC-hoof se regsverteenwoordiger, Veikko Alexander, Woensdag aan regter Christie Liebenberg gesê.Die klag hou verband met bewerings dat Nghixulifwa die grond waarop die B1 City-ontwikkeling in Windhoek sou gebou word namens Ae//Gams Engineering met sowat N$4,5 miljoen van die Paaiekontrakteursmaatskappy (RCC) gekoop het. Nghixulifwa en sy medebeskuldigdes, Anna Ndoroma en Hafeni Nghinamwaami, het aansoek om kwytskelding in terme van afdeling 174 van die strafproseswet gedoen. Nghixulifwa het na bewering aandele in Ae//Gams Engineering besit. Die staat beweer hy het glo ’n wanvoorstelling van dié feit gemaak toe die RCC-raad ’n besluit geneem het wat glo vir Ae//Gams Engineering sou bevoordeel.Alexander het aangevoer dat ’n gedeelte van die staat se bewyse wat betrekking op dié klag het, slegs gebaseer is op hoorsê.Ndoroma en Nghinamwaami se regsverteenwoordigers, Silas-Kishi Shakumu en Trevor Brockerhoff het gevra dat beide op drie en vier klagte teen hulle vrygespreek word. In verband met ’n klag van korrupsie en die misbruik van haar posisie vir selfverryking, het Shakumu gesê niks onwettig het gebeur nie en dat die beweerde korrupte saketransaksies reeds plaasgevind het toe Ndoroma ’n aandeelhouer in Ae//Gams Engineering geword het. Ae//Gams Engineering en die RCC het onderneem om die B1 City-ontwikkeling te voltooi. Brockerhoff het aan Liebenberg gesê dat daar slegs twee keer tydens hofverrigtinge na Nghinamwaami verwys is. “Daar kan gesê word dat die derde beskuldigde [Nghinamwaami] nie betrokke was by transaksies verwant aan die klag [van bedrog] nie,” het Brockerhoff gesê. Die drie beskuldigdes staan gesamentlik tereg op 11 klagte en alternatiewelike klagte wat spruit uit bewerings dat Nghixulifa sy posisie as uitvoerende hoof van die RCC misbruik het vir selfverryking.– irene@republikein.com.na

B1 City-saak: Drie vra om kwytskelding

Kommentaar

Republikein 2025-06-17

Meld asseblief aan om kommentaar te lewer

B1 City-saak: Drie vra om kwytskelding

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie