Aroab BV ruk op teen 19-jarige 'verkragter'

Lede van die Aroab Boerevereniging (BV) het gister na die rondgaande hof op dié Suidedorp opgeruk in teenkanting teen die toestaan van borgtog aan ’n vermeende verkragter van ’n 61-jarige boervrou.Boere en die gemeenskap het ’n klagskrif aan die rondgaande hof op Aroab oorhandig toe die 19-jarige Joslen Jean Otto op aanklagte van verkragting, diefstal en dwarsboming van die gereg verskyn het. Die beskuldigde bly in aanhouding in die aanhoudingselle op die dorp. Sy saak is tot 20 September vir verdere polisieondersoek uitgestel, asook vir Otto om om regshulp aansoek te doen.Volgens ’n lid van die BV wat by die hof was vir ’n veediefstalsaak, het Otto verlede jaar op hul plaas skape geslag en was hy agter tralies vir veediefstal. “Hy was vir ses maande toegesluit en het Maart uitgekom. Hy is een van die daggahardlopers. Hulle slag skaap en verkoop ’n stuk vleis soos ’n skaapboud vir slegs N$80 en hardloop vir dagga. Hulle meng die dagga met Mandrax,” het die BV-lid gesê. “Dis dieselfde storie oor en oor, dis nimmereindigend. Daar is Saterdag geslag en Sondag was die aanval [op die slagoffer]. Ons sny elke tweede dag spoor.” Veediefstal is ’n groot kwessie in die omgewing met boere wat kameras moet opsit, “maar hulle systap dit”.Die BV-lid sê Otto was verlede jaar ’n stukwerker op die slagoffer se plaas en het haar Sondagaand aangeval terwyl haar man weg op ’n jagtog was. Volgens die Namibiese polisie is N5 000 kontant gesteel. “Hy het glo ook drank, malvalekkers en koekies gesteel. Die polisie het vir my gesê hy is glad nie ’n gewelddadige mens nie, maar die tannie het blou kolle soos hy haar rondgestoot het,” het die BV-lid gesê.Die boere en gemeenskap staan bankvas agter die slagoffer wie se man en seun terug is by haar ná die traumatiese voorval. Dit volg nadat hulle en die Namibiese polisie Sondagaand saamgespan en ’n reusesoektog na Otto van stapel gestuur het wat in die bergagtige gebied op die vlug geslaan het. Hy is Maandag omstreeks 03:00 op Aroab vasgetrek. – francoise@nmh.com.na

Aroab BV ruk op teen 19-jarige 'verkragter'

Kommentaar

Republikein 2025-12-16

Meld asseblief aan om kommentaar te lewer

Aroab BV ruk op teen 19-jarige 'verkragter'

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.