Air Namibia: Oudwerkers veg vir nog geld

Hoewel die voormalige werknemers van die gelikwideerde nasionale lugredery Air Namibia reeds hul vergoedingspakkette ontvang het, is hulle tans in ’n hofstryd met die likwidateurs gewikkel vir nog geld wat hulle beweer steeds aan hulle verskuldig is.’n Groot groep van die oudwerknemers was Woensdag in die hoërhof in Windhoek teenwoordig toe advokaat Natasha Bassingthwaighte hul finale argumente gelewer het. Die werknemers eis dat nog sowat N$2,5 miljoen aan die groep uitbetaal moet word en dat hul voordele – soos bydraes aan mediese fondse, pensioen en die Maatskaplike Voorsorgfonds – aan hulle verskuldig word as deel van hul vergoedingspakkette.UITBETALINGIn Desember 2022 het die Air Namibia-werknemers hulle eerste betalings van die likwidateurs ontvang.“Ek het N$261 662 ontvang hoewel my eis N$388 609 was. My eisbedrag is dus met ’n bedrag van N$126 947 verminder,” het een van die voormalige werknemers, Renier Bougard, in sy verklaring gesê en bygevoeg dat hulle nooit ’n uiteensetting van die betaling ontvang het nie.Die likwidateurs van Air Namibia het glo altesaam N$103 miljoen aan werkers uitbetaal en volgens Bougard is ooreengekom dat die groep sowat N$105,5 miljoen moet ontvang.Bougard en die res van die werknemers het reeds in Junie verlede jaar ’n klagskrif aan die ministerie van justisie oorhandig waarin hulle die volle betaling geëis het.KOSTE AAN MAATSKAPPYLuidens Bougard se verklaring het die werknemersvakbond en die destydse bestuur van Air Namibia in Maart 2021 ooreengekom dat die vergoedingspakkette nie net op hul basiese inkomste en toelaes gebaseer sal word nie, maar op hul totale koste aan die maatskappy.Die werknemers is meegedeel dat hul vergoedingspakkette een maand se salaris insluit wat op die werknemer se totale koste aan die maatskappy bereken is, volgens sy verklaring.Bykomend hiertoe is werknemers glo belowe om betaling op grond van opgehoopte verlofdae en ’n 13de tjek te ontvang. Skeidingspakkette is ook uitbetaal op grond van die aantal jare van indiensneming. Ses maande later het die werknemers steeds nie hul uitbetalings ontvang nie en het dit aan die lig gekom dat die likwidateurs die bedrae wil herbereken om slegs die basiese salaris en toelae in te sluit.Die werknemers het toe ’n saak by die arbeidshof aanhangig gemaak, maar die aansoek is van die hand gewys. Hulle het daarna die hoërhof in Windhoek genader met die huidige aansoek.LIKWIDATEURSAir Namibia se likwidateurs, David Bruni, Ian McLaren en Simon Steyn, het die hulp van advokaat Raymond Heathcote ingeroep om die eis vir hierdie bykomende betalings teen te staan. Die prokureur Corlia Maritz het Woensdag in die hof verskyn om dié argumente te lewer. Sy het tydens haar argumente aangevoer dat die wet op vergoeding stipuleer dat die werknemers slegs betalings kan ontvang wat aan hulle verskuldig is. Sy het aangevoer dat die maatskappy se bydrae (company contributions) nie aan die werknemer verskuldig is nie.“Die Maatskaplike Voorsorgfonds is byvoorbeeld ’n bydrae wat die maatskappy aan ’n derde party verskuldig is. Dit is aan die Maatskaplike Voorsorgfonds verskuldig en nie aan die werknemer nie.”Maritz het verder benadruk dat indien die werknemer kies om nie voordeel te trek uit die maatskappy se mediesefondsvoordele nie, word die geld nie aan hulle uitbetaal nie. Sy voer aan dat die geld dus nie aan die werknemer verskuldig is nie.Maritz het ook in die hof genoem dat die likwidateurs beweer hulle was nie betrokke in gesprekke tussen Air Namibia se bestuur en die vakbond nie. Hulle was glo nie betrokke by die ooreenkoms wat aangegaan is oor die pakkette nie.Hulle voer aan dat die bestuur nie by magte was om so &#039;n ooreenkoms aan te gaan nie en hulle is daarom nie daartoe verbind nie.Regter Collins Parker het die uitspraak vir 14 Augustus geskeduleer.– kristien@nmh-hub.com.na

Air Namibia: Oudwerkers veg vir nog geld

Kommentaar

Republikein 2026-08-03

Meld asseblief aan om kommentaar te lewer

Air Namibia: Oudwerkers veg vir nog geld

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.