‘PDM-6’ vra N$8 m. van die parlement

Ses parlementslede van die Popular Democratic Movement (PDM) wat onwettig verwyder is van die party se parlementêre lys van 2019 wat in die Staatskoerant gepubliseer is, dring aan op die volle betaling wat hulle sou ontvang het indien hulle nie van dié lys verwyder is nie. Die groep het vir twee jaar die saak in die howe beveg, met hul eis wat N$8 miljoen beloop. Hidipo Hamata, Charmaine Tjirare, Yvette Araes, Maximalliant Katjimune, Raymond Diergaardt en Mike Venaani is van die amptelike lys van verkose PDM-lede verwyder, nadat die Verkiesingskommissie van Namibië (ECN) die uitslae van die November 2019-verkiesing aangekondig het. Nadat hulle verwyder is, het Hamata en Tjirare die besluit in die verkiesingshof uitgedaag wat in hul guns beslis het. Die PDM het appèl teen die beslissing aangeteken, maar sy aansoek is van die hand gewys. Dit het die weg vir die ses geraakte lede gebaan om uiteindelik in Junie 2022 by die parlement aan te sluit. Dit was meer as twee jaar nadat alle wetmakers wat in 2019 verkies is, in Maart 2020 ingesweer is.Nie een van die ses lede het enige realistiese vooruitsigte om ná verlede week se algemene verkiesing parlement toe te gaan nie. Volgens die jongste statistiek gaan die PDM waarskynlik 11 van die 16 setels verloor wat hulle in 2019 gewen het. Die party sal na verwagting op die meeste vyf setels wen. Op nommer 10 op die PDM se parlementêre lys vir vanjaar se verkiesing is Katjimune die beste geposisioneer om die parlement te haal onder die ses lede wat betaling van die parlement eis.Die setels in die Nasionale Vergadering (NV) wat teen gister aan die PDM toegewys is, word beset deur die party se leier, McHenry Venaani, Winnie Moongo, Ricky Vries en Rosa Mbinge Tjeundo. Inna Hengari, wat vyfde op die partylys geplaas is, het ’n buitekans om die vyfde setel vir die party te verseker. Beide Hamata en Katjimune het Network Media Hub (NMH) gister vir kommentaar na hul regsverteenwoordiger verwys. Volgens hul regsverteenwoordiger Norman Tjombe, het die verwydering van die ses van die 2019-lys van parlementslede die Namibiese Grondwet en die verkiesingswet oortree wat bepaal dat net die voorsitter van die Verkiesingskommissie die gesag het om die lys van behoorlik verkose parlementslede af te kondig. Tjombe sê sy kliënte moes op 20 Maart 2020, die datum wat deur die ECN vasgestel is, as lede van die NV ingesweer geword het. Hul name is egter aanvanklik uit die insweringsproses weggelaat wat eers op 6 Junie 2022 reggestel is, nadat die hof in hul guns beslis het. ’n Berekening deur NMH toon dat elk van die ses lede ’n inkomste van N$1, 3 miljoen tussen Maart 2020 en Junie 2022 verloor het. Dit bring hul gesamentlike verlies op net meer as N$8 miljoen te staan. Parlementslede verdien N$51 000 per maand en N$620 000 jaarliks. “Ons instruksies is om aan te dring en soos ons hiermee doen, dat ons kliënte hul normale vergoeding vanaf 20 Maart 2020 betaal word, insluitend die voorsiening vir pensioenbydraes. “Sou dit nie gedoen word nie, sal regstappe met koste teen die Nasionale Vergadering geneem word. Geskrewe bevestiging van die betaling moet nie later nie as 11 Desember 2024 ontvang word,” aldus die prokureursbrief. Die NV se sekretaris-generaal, Lydia Kandetu, kon nie gister vir kommentaar bereik word nie. – republikein@republikein.com.na

‘PDM-6’ vra N$8 m. van die parlement

Kommentaar

Republikein 2026-02-03

Meld asseblief aan om kommentaar te lewer

‘PDM-6’ vra N$8 m. van die parlement

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.