Noordetoer bedien meer pasiënte met endoskopie

Die lang reis na die Onandjokwe intermediêre hospitaal vir endoskopiedienste kan vir vele pasiënte in die noorde iets van die verlede wees, aangesien spesialisdokters die diens direk na hul voorstoep gebring het.

Dis te danke aan die Prof. Filemon Amaambo-endoskopietoer, ’n uitreikinisiatief deur spesialiste en gesondheidswerkers van die Onandjokwe intermediêre hospitaal, wat daarop gemik is om diagnostiese en terapeutiese dienste vir die spysverteringskanaal te desentraliseer en nader aan gemeenskappe te bring – veral dié in afgeleë en onderbediende gebiede.

Dr. Namutenya Malima het aan Network Media Hub gesê die uitreikaksie is in 2022 vir die eerste keer deur dr. Akutu Munyika van stapel gestuur, na aanleiding van ’n groot toestroming van pasiënte wat na Onandjokwe vir endoskopiedienste gereis het.

Malima sê die hoofdoelwitte is om toegang tot gespesialiseerde sorg te verbeter, die finansiële en logistieke las van reise vir endoskopie te verminder, die waglys te verkort en tydige diagnose en behandeling van siektes van die spysverteringskanaal te fasiliteer.

Die program is in Oktober 2025 formeel die Prof. Filemon Amaambo-endoskopietoer gedoop, en behels nou jaarliks twee uitreiksiklusse in die noordelike streke.

Die huidige siklus het vyf hospitale oor vyf opeenvolgende dae gedek wat op dag een by die Omuthiya-distrikshospitaal begin het, gevolg deur Tsumeb, Okongo en Eenhana, en laas Vrydag by die Engela-distrikshospitaal afgesluit.

Hoewel die totale aantal prosedures nog gekonsolideer word, het dr. Malima gesê die span het ’n aansienlike aantal esofagogastroduodenoskopieë (OGD's) en kolonoskopieë by die fasiliteite uitgevoer– insluitend biopsies waar aangedui, tesame met toepaslike verwysing en opvolg vir beduidende bevindinge.

Tydens die uitreikaksie het dokters ’n reeks gastro-intestinale toestande geïdentifiseer. Algemene bevindinge in die boonste spysverteringskanaal het gastritis, gastro-esofageale refluks, peptiese ulkussiekte, poliepe en verdagte gewasse in die ingewande ingesluit, terwyl kolonoskopieë probleme in die dikderm en rektum, inflammatoriese dermsiekte, divertikulêre siekte, poliepe en interne aambeie aan die lig gebring het.

Voordele

Dr. Malima verduidelik dat die uitreikaksie, deur dienste nader te bring aan pasiënte wat aan die kliniese kriteria voldoen, die druk op Onandjokwe en die verwysingstelsel verlig, asook die waglys vir endoskopieë verkort.

Sy voeg by dat die chirurgiese departement by Onandjokwe soortgelyke chirurgiese uitreikprogramme bedryf om sy eie agterstand te verminder.

Kapasiteitsbou staan ook sentraal tot die toer. Plaaslike gesondheidswerkers, veral verpleegpersoneel, neem aan die prosedures deel en ontvang praktiese opleiding in pasiëntvoorbereiding, bystand tydens prosedures, en die hantering en skoonmaak van endoskopietoerusting.

Die toer was nie sonder uitdagings nie. Dr. Malima sê die span het tydens hierdie siklus met slegs een endoskopie-eenheid gewerk terwyl hulle ’n hoë aanvraag moes hanteer, wat strategiese koördinering van die prosedureskedule vereis het.

Ten spyte hiervan is pasiënte volgens kliniese prioriteit behandel.

Die besoek aan Engela-distrikshospitaal het die einde van hierdie spesifieke uitreiksiklus aangedui, maar dr. Malima het pasiënte wat steeds wag, verseker dat daar begrip is vir hul behoefte aan tydige ondersoeke.

“Ons besef hoe belangrik tydige ondersoeke en behandeling van die spysverteringskanaal is. Die vordering wat gemaak is, is bemoedigend, en hopelik sal die uitreikprogram voortgaan om gespesialiseerde dienste nader aan gemeenskappe te bring, terwyl die Onandjokwe intermediêre hospitaal steeds beskikbaar bly om endoskopiese dienste te lewer aan pasiënte wat dit benodig,” het sy gesê.