Regering sluit wyle Nujoma se kantoor

Die regering het die kantoor van wyle stigterspresident Sam Nujoma amptelik gesluit, met die kabinet wat goedkeuring verleen het dat die perseel as ’n nasionale erfenisterrein bewaar word ter ere van dié geëerde staatsman se nalatenskap.

Nujoma, wat Namibië se vryheidstryd suksesvol gelei het, is in Februarie 2025 op die ouderdom van 95 oorlede.

Die kabinet het bevestig al die materiaal, artefakte en dokumente uit Nujoma se kantoor is deur die stigterspresident se eksekuteur, die Sam Nujoma-stigting en sy familie, aan die Nasionale Argief van Namibië (NAN) oorhandig.

Die regering het verder die kantoor van die eerste minister opdrag gegee om, in samewerking met die ministeries van werke en vervoer en onderwys, vernuwing, jeug, sport, kuns en kultuur, toesig te hou oor die strukturele omskakeling van die perseel in ’n nasionale museum.

In ’n verwante resolusie het die kabinet die onderwysministerie opdrag gegee om dringend ’n span te stuur om die toestand van die Etunda-trustfondsskool te beoordeel. Dié ingryping is daarop gemik om voortgesette leer vir kinders van Etunda en omliggende plase te verseker, terwyl die eiendom ook teen moontlike vandalisme beskerm word.

Toe sy vir kommentaar genader is, het die sekretaris van die kabinet, Emilia Mkusa, gesê die minister van inligting en kommunikasietegnologie (ICT) het reeds tydens ’n onlangse kabinetinligtingsessie ’n verklaring oor die saak uitgereik.

“Die saak is op 19 Maart 2026 deur die ICT-minister gekommunikeer,” het sy gesê.

Voordele en die kantore van voormalige presidente word as deel van die presidensie bestuur. Die konstruksie en opgradering van die stigterspresident se kantoorgebou is in 2008 op ongeveer N$17,2 miljoen begroot.

President Netumbo Nandi-Ndaitwah het vroeër aangedui voorsiening is gemaak vir ’n kantoor van die stigterspresident by Swapo se hoofkantoor.

“Noudat hy heengegaan het, sal die kantoor in die Swapo Sam Nujoma-museum omskep word, waar waardevolle items soos dagboeke, boeke en ander materiaal vir huidige en toekomstige geslagte bewaar sal word,” het sy verlede jaar tydens die onthulling van die Sam Nujoma-standbeeld gesê.

Sy het ook lede van die publiek versoek om tot die bewaringspoging by te dra.

“Ons doen ’n beroep op alle individue – Namibiërs en nie-Namibiërs – wat moontlik waardevolle geskiedkundige items besit wat aan die stigterspresident behoort het of met hom verband hou, om dit te oorweeg om die items aan die museum te skenk,” het sy gesê.

As leier van Swapo het Nujoma Namibië se eerste president geword ná die party se oorwinning in die 1989-verkiesings onder toesig van die Verenigde Nasies, en is hy op 21 Maart 1990 ingehuldig.

Hy het die amp aanvaar in ’n tyd toe die land diep deur koloniale bewind, rassediskriminasie en jare van gewapende stryd verdeeld was. 

Sy vroeë strewe na nasionale versoening het gepoog om rasse- en etniese verdeeldheid te oorbrug, terwyl sy administrasie demokratiese regering en die oppergesag van die reg gehandhaaf het asook daarna gestrewe het om ongelykhede uit die apartheidsera af te breek.

Gedurende sy termyn het Namibië bestendige ekonomiese vooruitgang getoon, hoewel uitdagings voortgeduur het. ’n Grondhervormingsprogram wat in 1990 van stapel gestuur is, het gedeeltes van kommersiële landbougrond herverdeel, maar strukturele swakhede in die landbousektor en landelike armoede was steeds beduidende bekommernisse.

Sy presidentskap was egter nie sonder omstredenheid nie. In 1992 het Noorweë droogtehulp gestaak ná staatsbesteding aan ’n presidensiële straler en VIP-helikopters, kort nadat ’n beroep om internasionale hulp gedoen is.

Nujoma is in 1994 herkies en weer in 1999 nadat ’n grondwetlike wysiging hom ’n derde termyn toegelaat het. Hy het in 2005 uitgetree en die leisels aan sy opvolger, Hifikepunye Pohamba, oorhandig, wat die presidentsverkiesing in 2004 gewen het. 

– [email protected]