Windhoek Sentraal het (warm) water!

Dit sou meer as 15 jaar neem voordat die Windhoek Sentrale Hospitaal uiteindelik aan sy pasiënte en personeel die opsie van warm water kon bied. Die lang wag het gister amptelik geëindig met 14 nuwe industriële geisers wat in dié besige staatshospitaal geïnstalleer is.Pasiënte wat vir jare lank noodgedwonge aan koue storte uitgelewer was en dikwels water met ketels in die gang moes kook, se bibber is verby nadat die lank vertraagde opgradering teen ’n koste van N$6,4 miljoen deur die ministerie van werke en vervoer in vennootskap met die ministerie van gesondheid en maatskaplike dienste voltooi is.Die minister van gesondheid, dr. Esperance Luvindao, het dit as meer as net ’n tegniese opgradering beskryf. “Dit is die herstel van waardigheid,” het die minister gesê.“Jy gaan hospitaal toe, skenk geboorte, met jou liggaam wat nou net deur ’n lewensveranderende ervaring gegaan het en gaan badkamer toe en dis yskoue water. Dis die werklikheid wat ons verander,” het Luvindao gesê.Warm water is nie ’n luukse nie, maar ’n basiese noodsaaklikheid vir pasiënte en personeel, het sy beklemtoon. “Ons praat nie net van N$6,4 miljoen nie. Ons praat van lewens wat geraak is. Dit is die waardigheid waarop hierdie projek gebaseer is.”Volgens die minister van werke en vervoer, Veikko Nekundi, het die projek sewe maande geduur en is dit teen ’n koste van N$6,4 miljoen deur Engineering Corporation and Parks Namibia, ’n 100% Namibiese onderneming, voltooi.Die opgradering sluit in die installering van moderne digitale beheerstelsels wat alle hospitaalvloere dek, die volledige opknapping van die kraamsaal se warmwaterstelsel en die vervanging van ou, geroeste pype met duursame, korrosiebestande pype.Die elektriese verspreidingsborde is opgegradeer en elke hoek van die hospitaal – van teaters en kombuise tot sale – het nou warm water.Nekundi het klem gelê op instandhouding en aanspreeklikheid, met die kontrakteur wat die geïnstalleerde stelsels vir die volgende 12 maande in stand sal hou. Die hospitaal se interne span sal kleiner herstelwerk behartig.“Ons moet daartoe verbind wees om in stand te hou wat ons gebou het. Betroubare infrastruktuur is die ruggraat van gesondheidsorgdienste. “Wanneer hospitale goed toegerus en in stand gehou word, kan ons gesondheidswerkers fokus op wat die belangrikste is: Die mense in hul sorg, die pasiënte,” het hy gesê.Beide Nekundi en Luvindao het die projek as ’n beginpunt in ’n breër nasionale poging beskryf om infrastruktuur in hospitale te verbeter. Luvindao het erken baie ander staatsgeriewe oraloor Namibië het soortgelyke uitdagings. “Die herstel van die warmwaterstelsel is die begin, dit is nie die einde nie.” – elizabeth@nmh-hub.com.na

Windhoek Sentraal het (warm) water!

Kommentaar

Republikein 2026-06-15

Meld asseblief aan om kommentaar te lewer

Windhoek Sentraal het (warm) water!

Kommentaar

Republikein 2026-06-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.