Wêreldklas-kankerbehandeling op Namibiese voorstoep

Henriette Lamprecht - Dit is die uitkoms van twee jaar van beplanning, samewerking en ‘n onwrikbare geloof in wat Namibië op die mediese gebied kan vermag.Dit simboliseer ‘n nuwe era van mediese onafhanlikheid en nasionale trots, sê die kliniese hematoloog dr. Kudakwashe Simba oor suksesvolle eerste outologiese stamseloorplanting in Namibië. &#039;n Outologiese stamseloorplanting is &#039;n prosedure waar &#039;n pasiënt se eie stamselle versamel word, sterk chemoterapie gegee word, en die selle teruggeplaas word om die liggaam te help herstel. Dit word gebruik vir toestande soos veelvuldige myeloom en sekere limfome. Ongeveer driekwart van limfoompasiënte kan met hierdie benadering genesing bereik.Die stamseloorplanting beteken ‘n nuwe era van mediese onafhanklikheid in die land, met inwoners se reise na die buiteland vir lewensreddende behandeling wat aansienlik minder is. Die oorplanting is deur die Namibië Beenmurg Samewerkingsgroep uitgevoer met dr. Simba as oorplantingsdokter en die Namibiese Onkologiesentrum (NOC), die Bloedoortappingsdiens van Namibië (NamBTS), Pathcare Namibia, die Kankervereniging van Namibië (CAN), en die Windhoek Sentrale Hospitaal se onkologiespan as nou betrokke vennote.NOC het nie vir ‘n oomblik gehuiwer om betrokke te raak toe dr. Simba twee jaar gelede sy visie gedeel het nie, sê besturende direkteur Stephanie Quarmby. “Ons het belê in gespesialiseerde opleiding vir ons verpleegpersoneel, ons geriewe opgradeer en ons daartoe verbind om deel te wees van iets groter as enige enkele organiasie. Dit is waaroor leierskap in gesondheid gaan, om die waagmoed te hê om eerste te wees,” sê Quarmby.Met dié eerste vir Namibië en die streek kan inwoners nou oorplantingsorg ontvang sonder om oor die landsgrense te reis en plaaslik hoogs-gespesialiseerde sorg in pas met internasionale standaarde ontvang. “Die vestiging van &#039;n stamseloorplantingsprogram in Namibië het &#039;n aansienlike verbintenis van die bloedoortappingsdiens vereis, insluitend gespesialiseerde opleiding en belegging in gevorderde sellulêre tegnologie. Hierdie mylpaal gaan oor meer as tegnologie. Dit gaan daaroor om Namibiese pasiënte toegang te gee tot lewensreddende sorg naby die huis,” het dr. Carla Van Zyl, mediese beampte by NamBTS, gesê.“Stamseloorplanting is eenvoudig nie moontlik sonder &#039;n toegewyde bloedoortappingsdiens nie. Ons span is verantwoordelik vir die versameling, berging en uitreiking van stamselle. Die versamelproses is veeleisend vir beide die pasiënt en die personeel, aangesien &#039;n enkele sessie tot agt uur kan duur en moontlik op opeenvolgende dae herhaal moet word om te verseker dat ons genoeg selle verkry. Vandag is die Bloedoortappingsdiens van Namibië trots om te help om hindernisse tot sorg te verwyder en te wys dat ons professionele persone gevorderde, gespesialiseerde sellulêre terapie veilig in Namibië kan lewer,” het Van Zyl gesê. Om na die buiteland te reis vir die behandeling, het pasiënte onder die finansiële druk van vlugte, verblyf en buitelandse hospitaalrekeninge geplaas, terwyl hulle ook lank van hul familie en ondersteuningstelsels weg is. Dikwels is vertragings in behandelings veroorsaak deur logistieke hindernisse, met koste wat so hoog is, dat baie pasiënte die behandeling noodgedwonge van die hand gewys het. Die mylpaal lê die grondslag vir toekomstige allogene (skenker) oorplantings en meer komplekse sellulêre terapieë. Planne is ook onderweg om staatshospitale ten volle in die oorplantingsroete te integreer.“Dit is noodsaaklik omdat die hoogste siektelas in die openbare sektor bestaan,” het dr. Simba gesê. “Sodra dit ten volle operasioneel is, sal staatspasiënte dieselfde standaard van oorplantingsorg as private pasiënte ontvang. Dit versterk die nasionale veerkragtigheid en berei Namibië voor vir selfs meer komplekse prosedures,” het hy beklemtoon. “Dit is ‘n nasionale oorwinning en ‘n bewys van wat ons kan bereik as ons saam werk,” het dr. Simba beklemtoon.“Namibië het bewys dat selfs hoëtegnologie-medisyne plaaslik ontwikkel kan word. Ons gesondheidswerkers het buitengewone toewyding en veerkragtigheid getoon. Hierdie prestasie behoort aan elke Namibiër.” - henriette@republikein.com.na

Wêreldklas-kankerbehandeling op Namibiese voorstoep

Kommentaar

Republikein 2026-01-23

Meld asseblief aan om kommentaar te lewer

Wêreldklas-kankerbehandeling op Namibiese voorstoep

Kommentaar

Republikein 2026-01-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.