Wêreldfisioterapiedag plaas kollig op laerugpyn

Fisioterapeute van oraloor die wêreld verenig jaarliks op 8 September om dié beroep te vier en te erken. Die Namibiese Vereniging van Fisioterapie (NSP) sluit met trots by die wêreldgemeenskap aan om Wêreldfisioterapiedag te vier onder vanjaar se tema van laerugpyn.Die inisiatief van dié dag word gedryf deur World Physiotherapy wat ’n wêreldwye liggaam is en meer as 600 000 fisioterapeute en organisasies uit meer as 128 lande verteenwoordig. Die NSP is ’n lid van World Physiotherapy en verteenwoordig byna 140 geregistreerde fisioterapeute landswyd.“Fisioterapeute in Namibië is die onbesonge helde wat onvermoeid agter die skerms werk om mobiliteit te herstel, pyn te verlig en die lewensgehalte vir behoeftiges te verbeter,” het die voorsitter van die NSP, Christine Nashenda, gesê.Fisioterapeute is kundiges in die ontwikkeling en instandhouding van mense se vermoë om deur hul leeftyd te beweeg en te funksioneer. Met ’n gevorderde begrip van hoe die liggaam beweeg en wat dit verhoed om goed en doeltreffend te beweeg, bevorder hulle mense se welstand, beweeglikheid en onafhanklikheid. Hulle behandel en help om talle probleme wat veroorsaak word deur pyn, siekte, gestremdheid en siekte, sport en werkverwante beserings, veroudering en onaktiwiteit te voorkom.Fisioterapeute word oor etlike jare opgelei, wat hulle ’n volledige kennis van die liggaam, stelsels en die vaardighede gee om ’n wye reeks probleme te hanteer. Hierdie opleiding is gewoonlik universiteits-gebaseer, op ’n vlak wat fisioterapeute toelaat om onafhanklik te praktiseer.Dit word ook aanbeveel dat fisioterapeute met voortgesette opleiding moet voortgaan om te verseker dat hulle op hoogte bly van die jongste vooruitgang in navorsing en praktyke.FISIOTERAPIE IN NAMIBIËIn Namibië het fisioterapeute beduidende vordering gemaak om die veld van fisioterapie en rehabilitasie te bevorder. Die Universiteit van Namibië (Unam) het ’n Baccalaureus Scientiae-gebaseerde fisioterapieprogram van stapel gestuur, wat sy derde groep gegradueerdes in 2024 opgelewer het. Die doel van die program is om die ernstige tekort aan fisioterapeute landswyd in beide die openbare en private sektor te verlig.Hoewel dié beroep ’n beduidende voordeel vir die samelewing inhou, is dit nie sonder sy uitdagings nie.Volgens Nashenda groei die behoefte aan fisioterapeute se dienste en dit sal na verwagting in die komende jare verder groei weens die toename in die ouer bevolking en individue wat nieoordraagbare siektes (NCD) opdoen. “NCD wat hoofsaaklik deur ’n sittende lewenstyl veroorsaak word, het bygedra tot die toename in neuromuskulêre skeletsiektes, soos meganiese laerugpyn in alle bevolkingsgroepe. Daar is glo steeds ’n geweldige tekort aan fisioterapeute in die land en weens die fisiek veeleisende aard van die werk en die behoefte aan voldoende vergoeding om professionele persone te behou, is dit veral staatsfasiliteite wat daaronder ly.“Die NSP wil graag hoërskoolleerlinge uit die streke aanmoedig om in hierdie rigting te studeer. Hulle glo dat gegradueerdes uit die verskillende streke meer geneig is om terug huis toe te gaan en hul beroep daar te beoefen,” meen Nashenda.Volgens hulle is daar ook ’n behoefte aan bewusmaking oor die dienste wat fisioterapeute aanbied en neem hulle dit op hulself om bewusmaking te skep en individue by te staan in hulle reis na optimale gesondheid.“'n Neiging wat aan die toeneem is, is dat rugpyn ’n relatief algemene simptoom by kinders en adolessente geword het,” verduidelik Nashenda.LAERUGPYNVir vanjaar se Wêreldfisioterapiedag val die kollig op ’n deurdringende gesondheidskwessie: laerugpyn en hoe om dit te bestuur en te voorkom.“Sowat 619 miljoen mense wêreldwyd sukkel met laerugpyn – dit is ongeveer een uit elke 13 individue. Dit is tyd om hierdie stille epidemie te takel,” lui ’n NSP-verklaring.Laerugpyn is ’n probleem wat alle ouderdomsgroepe raak. Terwyl die meeste gevalle binne ’n paar weke opgelos word, kan dit langer as drie maande duur wat dan in chroniese laerugpyn verander. “Wat interessant is, is dat 90% van laerugpyngevalle nie spesifieke oorsake het nie. Dit beteken dat daar geen enkele identifiseerbare skuldige (soos ’n gewrig, spier, ligament of skyf) is nie. Dit is nie aan enige ernstige onderliggende siekte verbind nie, maar die impak daarvan is ernstig.”Laerugpyn kan deur ’n kombinasie van fisieke en sielkundige faktore veroorsaak word, en ’n fisioterapeut kan in staat wees om raad hieroor te gee en hoe om 'n gesonder leefstyl aan te neem.FISIOTERAPIE SE BELANGRIKE ROLFisioterapeute verskaf meer as net behandeling; hulle bied ’n reddingsboei aan diegene wat met verskeie kwessies sukkel, insluitend laerugpyn.Hulle verskaf kundige leiding deur pasgemaakte raad te verskaf wat pasiënte help om hul pyn te verstaan en die pad na herstel te navigeer. Hulle bied ook ’n holistiese benadering. “Behalwe pynverligting, verbeter fisioterapie algemene gesondheid en welstand. Dit gaan oor meer as net rugpyn, dit gaan oor die verbetering van hulle lewens.”Fisioterapeute help ook met die noodsaaklike proses van rehabilitasie, hetsy of die pyn akuut of chronies is. Dit is ’n belangrike stap om pasiënte te bemagtig en hulle te help om terug te keer na hul gewone leefstyl en aktiwiteite waarvan hulle hou.’n Groot deel van vanjaar se veldtog vir die bestuur en voorkoming van laerugpyn, sluit in die aanbeveling van niechirurgiese ingrypings. Fisioterapeute glo dat oefening die beste medisyne vir laerugpyn is en lei ook hul kliënte deur die regte oefeninge wat by hul spesifieke behoeftes aangepas is.“Bewyse dui daarop dat oefening die doeltreffendste behandeling vir laerugpyn is. Jou fisioterapeut sal ’n oefenplan net vir jou aanpas.“Fisioterapeute verskaf kundige raad, leiding en behandeling. Hulle sal help om jou algemene gesondheid en welstand te verbeter. Terselfdetyf verminder hulle ook die kanse op toekomstige probleme.”Chroniese laerugpyn kan geassosieer word met gevoelens van depressie, swak leefstylgewoontes, en dra by tot ongewilligheid om aan werk en sosiale aktiwiteite deel te neem. Verskillende gesondheidswerkers, insluitend fisioterapeute, kan help om ook dié aspekte van laerugpyn te bestuur.Fisioterapeute gebruik iets wat bekend staan as ’n biopsigososiale benadering en hiertydens word verskeie faktore in ag geneem. Dit sluit in sielkundige faktore en die emosionele en geestelik impak van die pyn wat hulle ervaar. Hulle kyk ook na sosiale faktore wat gesinslewe insluit asook watter ondersteuningstelsels die pasiënt in plek het.– kristien@nmh-hub.com.na

Wêreldfisioterapiedag plaas kollig op laerugpyn

Kommentaar

Republikein 2025-11-04

Meld asseblief aan om kommentaar te lewer

Wêreldfisioterapiedag plaas kollig op laerugpyn

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.