Stuur malariatablette terug, sê ministerie

Ten spyte van die feit dat die ministerie van gesondheid en maatskaplike dienste aanvanklik beweer het dat ’n besending ongeregistreerde malariamedikasie uit Indië ten volle gekonfiskeer en in kwarantyn geplaas is, het die ministerie instruksies aan openbare gesondheidsinstellings landswyd uitgereik dat dieselfde medikasie teen Vrydag teruggestuur moet word. Die ministerie se uitvoerende direkteur, Penda Ithindi, het verlede week gesê geen pasiënte is met die medikasie behandel wat die land onwettig in Mei vanjaar ná ’n omstrede verkrygingsproses binnegekom het nie. Die besending, ter waarde van N$450 000, is sonder die vereiste registrasie of openbare tender ingevoer. “Die besending is in sy geheel op die koste van die invoerder gekonfiskeer. Dit is tans deur die Namibië Inkomste-agentskap (NamRA) in samewerking met die Namibiese Medisynebeheerraad (NMRC) in kwarantyn geplaas,” het Ithindi verlede week gesê.’n Kennisgewing gedateer 11 Junie en onderteken deur die ministerie se direkteur van farmaseutiese dienste, Naita Nghishekwa, weerspreek egter Ithindi se verklaring. In die kennisgewing gee Nghishekwa opdrag aan alle openbare gesondheidsgeriewe om onmiddellik die 300 mg-kiniensulfaattablette wat deur Africure Pharmaceuticals (India) Pyt Ltd vervaardig is, teen Vrydag na die Sentrale Mediese Store (CMS) terug te stuur.“Die ministerie gee hiermee opdrag aan alle geriewe wat die 300 mg-kiniensulfaattablette ontvang het of in voorraad het, om dit teen die laaste Vrydag 20 Junie 2025 na die Sentrale Mediese Store terug te stuur,” lui die kennisgewing.Die kennisgewing lui verder “dit is belangrik om by die vermelde sperdatum te hou weens die dinamika van omgekeerde logistiek en om die CMS in staat te stel om die betrokke verslag betyds saam te stel soos deur die NMRC versoek is. Geen terugsendings van die voorraad sal ná die sluitingsdatum aanvaar word nie”.Die opdrag geld vir alle staatshospitale, klinieke, apteke en gesondheidsentrums oraloor die land. Die ministerie het sy noodaankope van die medikasie verdedig en verwys na die dringende behoefte om ’n malaria-uitbreking hok te slaan. Kommer neem egter nou toe dat dié dringendheid moontlik tot die verspreiding – én die moontlike uitdeling – van die ongeregistreerde medisyne aan pasiënte gelei het.Teen druktyd het Ithindi nog nie gereageer op vrae oor die oënskynlike teenstrydigheid tussen sy vroeëre versekering en die kennisgewing om die medikasie te herroep nie.Die ministerie het nog nie openbare raad oor die veiligheid van die medikasie uitgereik nie en het ook nie bevestig of enige gesondheidsrisiko’s geïdentifiseer is nie. MINISTERDie minister van gesondheid, dr. Esperance Luvindao, het op 10 Junie in die parlement erken verskeie oortredings is met die verkrygingsproses van die medikasie gepleeg. Dit sluit in die oortreding van die Wet op die Beheer van Medisyne en Verwante Middele van 2003, sowel as die vervanging van ’n goedkeurde Suid-Afrikaanse handelsnaam en produk met ’n ongeregistreerde produk wat in Indië vervaardig is. “Hierdie oortredings is onaanvaarbaar en verteenwoordig ’n ernstige oortreding van die regulatoriese raamwerk,” het Luvindao gesê. Sy het bygevoeg dat diegene wat betrokke is, vervolging en moontlike uitsluiting ingevolge die openbare verkrygingswet in die gesig staar. Die tablette is van West Pharmaceuticals aangekoop sonder ’n openbare tender en ingevolge die bepalings vir noodaankope. – republikein@republikein.com.na

Stuur malariatablette terug, sê ministerie

Kommentaar

Republikein 2025-12-19

Meld asseblief aan om kommentaar te lewer

Stuur malariatablette terug, sê ministerie

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.