Skenkings versterk staat se ‘arsenaal’ in Covid-stryd

Elizabeth //Kheibes - Skenkings van broodnodige gesondheidsorgtoerusting vir pasiënte wat van die staat se gesondheidstelsel afhanklik is, het ’n groot rol daarin gespeel om die stelsel aan die gang te hou tydens die Covid-19-pandemie se piek. Dit volgens statistiek wat die ministerie van gesondheid en maatskaplike dienste onlangs vrygestel het.Die regering het hom tussen 2020 en 2022 in ’n gesondheidskrisis bevind terwyl die pandemie duisende lewens geëis het, deels weens die openbare gesondheidstelsel se onvermoë om die pasiëntgetalle en beperkte finansiële hulpbronne te hanteer.Amptelike statistiek toon Namibië het van Januarie 2020 tot Augustus 2023 171 998 bevestigde Covid-gevalle en 4 098 sterftes weens die virus aangeteken.Tydens die pandemie is sowat 20 341 stuks gesondheidstoerusting deur verskeie rolspelers in die gesondheidsorgbedryf geskenk. Die ministerie het gedurende hierdie tydperk slegs sowat 1 315 verskillende stukke toerusting aangeskaf.Die toerusting het gewissel van intensiewesorg (ICU)-ventilators, positiewelugwegdruk (CPAP)-apparate, ultraklankmasjiene, suurstofkonsentrators, defibrillators, infusiepompe, lugbevogtigerbottels, elektrokardiogram (EKG)-masjiene, endoskopiese toestelle, X-straalmasjiene, bababroeikaste en dialisemasjiene.Gesondheidsowerhede het gesê die toerusting het die regering se arsenaal versterk tydens die stryd teen die dodelike virus.Ondanks die feit dat die situasie onder beheer gebring is, gaan die land se staatsgesondheidstelsel post-Covid voort om gesondheidsowerhede slapelose nagte te gee.Die krake in die stelsel is onlangs blootgelê nadat parlementariërs wat gesondheidsorgfasiliteite in onderskeidelik Zambezi en die Kavango-Wesstreek besoek het, eerstehands ervaar het onder watter omstandighede gesondheidspersoneel dié dienste moet lewer.Daar het die parlementslede ’n blik gekry op van stukkende wasmasjiene en verkoelingseenhede tot medisyne wat aangehou word in stoorkamers wat buite werking is, groot tekorte aan beddens en medikasie, onvoldoende personeelgetalle en ’n stadige verkrygingstelsel. Die gesondheidsministerie se uitvoerende direkteur, Ben Nangombe, het gesê die ministerie is besig met die uitrol van verskeie projekte oraloor die land wat ten doel het om die lewering van gesondheidsorgdienste te verbeter.Nangombe het gesê die ministerie het reeds uitgebreide “inligting en verduidelikings” verskaf oor die tekortkominge in die stelsel.“Die waarnemings kom in die nasleep van inligting wat gedeel is en verslae wat geskryf is na aanleiding van besoeke aan openbare gesondheidsfasiliteite deur lede van die Nasionale Raad (NR) se staande komitee oor gesondheid, maatskaplike dienste en arbeidsaangeleenthede.Nangombe het gesê die ministerie is in die proses om ’n kontrakteur aan te stel om die wanfunksionele verkoelingstoerusting by Rundu se mediese stoor reg te stel, wat ְ’n gevaar inhou vir die stoorleeftyd van medisyne ter waarde van meer as N$20 miljoen wat by die fasiliteit gestoor word.By die Sibbinda-gesondheidsentrum in die Zambezistreek het foutiewe toerusting ook daartoe gelei dat lede van die publiek nie voldoende gesondheidsorg kon ontvang nie.Een van die gesondheidsorgbeamptes by die sentrum, Lawrence Napulaga, het gesê die foutiewe toerusting is intussen herstel.“Dit werk baie goed. Die ministerie het dit so vyf maande gelede kom regmaak,” het Napulaga Woensdag by navraag gesê.Die waarnemende gesondheidsdirekteur in die Kavango-Oosstreek, John Woita Kapumburu, het op sy beurt gesê die ministerie is besig om ’n kontrakteur te soek om te begin werk aan die toerusting wat vir herstelwerk geoormerk is.“Die laaste kommunikasie deur die uitvoerende direkteur het die plan vorentoe uiteengesit. Wat oorbly is om ’n kontrakteur op ’n noodbasis op die perseel te kry. Toe die staande komitee kom, was die ministerie reeds besig met die proses.” – republikein@republikein.com.na

Skenkings versterk staat se ‘arsenaal’ in Covid-stryd

Kommentaar

Republikein 2026-05-05

Meld asseblief aan om kommentaar te lewer

Skenkings versterk staat se ‘arsenaal’ in Covid-stryd

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.