Raad sê prakties meer doeltreffend as eksamen

Die praktiese opleiding van buitelandse leerlingdokters help nie net in die evaluering van basiese mediese en lewensvaardighede en met kennis in werklike situasies nie, maar help hulle ook om vertroud te raak met Namibiese gesondheidstelsels wat anders is as waarin hulle studeer het. Dit, sê die registrateur van die Raad vir Gesondheidsberoepe in Namibië (HPCNA), mnr. Cornelius Weyulu, kan nie deur die sogenaamde “raadseksamen” verkry word nie. Weyulu het verwys na ’n besluit van die HPCNA in Maart vanjaar om leerlingdokters by die raad te registreer wat die remediërende program voltooi het sonder dat hulle dié eksamen afgelê het. “Die betrokkenes het die praktiese opleiding suksesvol onder die toesig en leermeesterskap van geregistreerde mediese praktisyns en of spesialiste voltooi in hospitale wat deur die raad goedgekeur is,” het Weyulu gesê.Gebaseer op getuienis van die opleidingshospitale en die leerlingdokters, was daar volgens hom geen regverdiging om die betrokkenes aan ’n teoretiese geskrewe vraestel te onderwerp, voordat hulle met die twee jaar internskap begin nie. Volgens hom word die evalueringsvraestel van die Mediese en Tandheelkundige Raad deur dieselfde persone saamgestel wat as leermeesters in die opleidingshospitale tydens hul praktiese opleiding opgetree en bevestig het dat hul gereed is vir hul internskap. Weyulu sê die raad sal in die tussentyd voortgaan met ’n geskrewe vraestel vir alle buitelandse mediese gegradueerdes en slegs dié wat dit gedruip het, sal in die praktiese opleidingsprogram opgeneem word. “Die doel hiervan is om dié wat die geskrewe eksamen geslaag het, toe te laat om met die internskap te begin sonder om maande in die praktiese opleidingsprogram te wees.”Sou die eerste groep van die praktiese opleidingsprogram egter die internskap met vlieënde vaandels slaag, sê Weyulu is die kanse goed dat daar in die toekoms heeltemal met die geskrewe vraestel weggedoen gaan word. Volgens hom het meer as 100 gegradueerdes die praktiese opleiding voltooi, maar styg die getal omdat dié wat sekere afdelings moes herhaal het, dit voltooi het. Hy het beklemtoon geen mediese gegradueerde, insluitend dié van Unam se mediese skool, is vanjaar as leerlingdokter geregistreer nie.Dit sal slegs gedoen word wanneer die ministerie van gesondheid en maatskaplike dienste plasingsbriewe vir internskap aan hulle uitreik. Die internskap behoort in September vanjaar te begin. Volgens Weyulu is registrasie vir die praktiese opleidingsprogram een manier om persone wat nie hiervoor kwalifiseer nie, te verhoed om deel hiervan te word. Tweedens moet die houer van die registrasiesertifikaat ook by die ministerie aansoek doen om tot die program toegelaat te word. “Niemand neem aan die program deel sonder dat hulle deur hierdie beheermeganismes gegaan het nie.”Weyulu het beklemtoon dit is nie die raad se beleid om mediese gegradueerdes deur middel van die geskrewe evaluasie te verhoed om hul internskap te begin nie. “Albei evaluerings is ingestel en bestuur deur die raad wat in ooreenstemming met die verwante wette, beleidsrigtings en riglyne besluit wie doen wat, wanneer en hoe.”Mediese gegradueerdes kry drie kanse per aansoek om die geskrewe evaluering deur te kom. Indien hulle al drie druip, word die aansoek gesluit. “Die persoon is vry om weer aansoek te doen, maar dit moet vergesel wees van wesenlike bewyse dat hy of sy bykomende onderrig en opleiding by ’n geregistreerde opleidingsentrum ondergaan het. Afhangend van die sukses van die nuutingestelde praktiese opleiding, is dit hoogs waarskynlik dat die drie geskrewe pogings geëvalueer sal word.”Volgens die verwante regulasies is die praktiese opleiding vir ’n tydperk van nie meer as 12 maande nie en wat binne die gegewe tyd voltooi moet word. Dié wat dit nie binne die bepaalde tyd voltooi nie, is “uit die program.”“Die huidige wet bemoei hom nie met die persoon wat nie die geleentheid wat aan hom of haar gegee is, suksesvol benut het nie. Dié individue moet vir formele bykomende opleiding by erkende onderriginstellings van hul keuse aansoek doen.” – henriette@republikein.com.na

Raad sê prakties meer doeltreffend as eksamen

Kommentaar

Republikein 2025-12-19

Meld asseblief aan om kommentaar te lewer

Raad sê prakties meer doeltreffend as eksamen

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.