Psemas: Hersien voordele, bybetalings

‘n Groep beswaarde lede van die staat se mediese fonds, Psemas, het ‘n beroep op die ministerie van finansies gedoen vir ‘n dringende oorsig van mediese voordele, uit-die-sak-bybetalings en toegang tot gesondheidsdienste. Psemas-lede se maandelikse bydraes het in April vanjaar verdubbel vir van hooflede tot afhanklikes, terwyl voordele terselfdertyd drasties verminder het. Dit het daartoe gelei dat baie private dokters en aptekers nie meer Psemas-lede wil help nie, terwyl van hul voordele reeds uitgeput is. In die petisie gedateer 12 Oktober en wat aan Psemas se bestuursraad oorhandig is, verwys die groep na vermindering van voordele, beperkings op medikasie, laboratoriumtoetse en skanderings, toelatings vir selfmedikasie, tariewe vir diensverskaffers, asook toegang tot gesondheidsdienste wat as ‘n saak van dringendheid ondersoek moet word. Die petisie vra ook vir verhoogde deursigtigheid en dat lede in toekomstige veranderinge geken moet word. Dit verwys na chroniese en akute medikasie waar Psema-pasiënte bykomende aptekersfooie moet betaal wanneer pryse die tariewe oorskry, met van die medikasie wat uitgesluit is van die toepaslike formulering van limiete op voordele. Die voordelelys vir akute medikasie het ‘n individuele voordeellimiet van N$7 000 wat volgens die groep ook onvoldoende mag wees vir lede wat gereelde medikasie vereis.Volgens Psemas-reëls geld 100% van die toepaslike Psemas-tariewe vir chroniese en akute medikasie, onderhewig aan voordeellimiete en skemareëls. Hoë laboratoriumkoste put volgens die petisie ook lede se beskikbare voordele uit en lei tot beduidende uit-die-sak-uitgawes, insluitend vir noodsaaklike mediese toetse. Psemas-lede se voordele vir patologie en radiologie buite ‘n hospitaal word beperk op N$5 000. Verskillende limiete geld vir ander lidmaatskap-kategorieë.Gewone patologie en radiologie buite ‘n hospitaal deel volgens die petisie ‘n voordeelstruktuur, terwyl vir CT- en MRI-skanderings afsonderlik onder gespesialiseerde skanderings voorsiening voor gemaak word. Die dringende evaluering vra vir ‘n dringende oorsig van die voordele vir akute en chroniese medikasie en om toegang tot noodsaaklike mediese behandeling te verbeter. Die voordeel vir selfmedikasie moet ook jaarliks van die huidige vlak tot ‘n voorgestelde N$3 000 per begunstigde verhoog word, onderhewig aan bekostigbaarheid en ‘n volhoubaarheidsoorsig. Die petisie versoek dat voordeelbeperkings op patologie en radiologie hersien moet word, terwyl duidelikheid gevra word oor die reëls, beperkings, asook die verwysings- en goedkeuringsprosedures vir CT- en MRI-skanderings. Vergoedingstariewe vir verskaffers van gesondheidsdienste moet ook hersien word om die “onredelike” uit-die-sak-uitgawes vir lede te verminder. Psemas-lede en verteenwoordigers uit al 14 streke behoort ook gekonsulteer word, voordat grootskaalse toekomstige veranderinge aan bydraes en voordele geïmplementeer word. Toegang tot diensverskaffers moet verbeter word deur saam met dokters, spesialiste, apteke en diagnostiese diensverskaffers te werk wat Psemas-lede behandel. ‘n Deursigtige proses vir voorskrifte, voordeelverwante besluite en vir lede om appèl aan te teken is volgens die petisie ook ‘n moet. Dit vra ook vir die beskerming van die langtermyn-volhoubaarheid van Psemas, terwyl verseker word dat lede en afhanklikes steeds toegang tot noodsaaklike gesondheidsdienste het. Psemas se nuwe voordele het saam met Visie April 2026 afgeskop, met staatsamptenare wat ingevolge die regeringsinisiatief verplig word om van staatsgeriewe gebruik te maak. Dis in ’n poging om openbare gesondheidsorg te verbeter en te versterk. Republikein het toe berig lede het sedert 1 April onbeperkte voordele vir hospitalisasie in staatshospitale as deel van die hoër opsie, maar word beperk tot N$350 000 per begunstigde en N$700 000 per familie sou hulle in ‘n private hospitaal opgenoem word. ‘n Ingeligte bron in die mediesefondsbedryf het toe gesê dis nie genoeg om groot prosedures te dek nie. MRI- en CT-skanderings binne en buite die hospitaal word beperk tot N$30 000 per familie en benodig ’n verwysing van ’n mediese spesialis. Verwysing van ’n algemene praktisyn vir CT-skanderings tydens ’n noodgeval is net geregverdig in die geval van kopbeserings. Akute medikasie word beperk tot N$7 000 per lid, terwyl chroniese medikasie wissel van N$15 000 vir die hooflid tot N$35 000 vir ’n hooflid met vier afhanklikes. - henriette@republikein.com.na

Psemas: Hersien voordele, bybetalings

Kommentaar

Republikein 2026-11-16

Meld asseblief aan om kommentaar te lewer

Psemas: Hersien voordele, bybetalings

Kommentaar

Republikein 2026-11-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.