Premies met (net) 9,9% verhoog

Die Toesighoudende Owerheid vir Finansiële Instellings in Namibië (Namfisa) het ’n tydelike beperking van 9,9% op die jaarlikse verhoging van lede se premies van mediese fondse geplaas. Die bedryf het tot 20 Maart 2024 tyd om aansoeke vir bykomende verhogings van premies saam met realistiese mediumtermyn-strategieë in te dien om die volhoubaarheid van die fondse te verseker. Die stap volg ná beduidende verskille tussen werklike en voorspelde solvensiesyfers die afgelope drie tot vier jaar opgemerk is. Laasgenoemde word volgens Namfisa dikwels deur lede se bydraekoers en veranderings aan beperkings van voordele geabsorbeer. Die owerheid het ook kommer uitgespreek oor die gebrek aan realistiese en meetbare mediumtermyn-strategiese planne tydens die goedkeuringsproses van die wysiging van reëls vir 2024 – wat vrae laat oor die geloofwaardigheid van sekere mediese fondse se solvensievoorspellings.Volgens Namfisa moet mediese fondse in die lig van die stygende koste vir gesondheidsorgdienste innoverende oplossings vind om die finansiële las op individue en families te verlig deur met verskaffers van dié dienste en administrateurs saam te werk om ’n nuwe ekwilibrium in terme van pryse te vind wat bekostigbaarheid en volhoubaarheid prioritiseer.Die owerheid se uitvoerende hoof, Kenneth Matomola het ’n beroep op fondse gedoen om na die onderhandelingstafel met beide mediese en nie-mediese diensverskaffers terug te keer om die voortdurende styging in premies hok te slaan. Hy verwys na die potensiaal van tegnologie om doeltreffendheid in die bedryf te verhoog deur dit onder meer in te span vir die ontleding van data.“Die saamgestelde uitwerking van jaarlikse premieverhogings en vermindering van voordele wek kommer oor die bekostigbaarheid van mediese fondse. Word dit nie gemonitor nie, sal dit mediese hulp oor die lang termyn hoogs onbekostigbaar maak en die uitdagings vererger wat die bedryf in die gesig staar,” het Matomola gemaan. Hy het die behoefte vir deursigtigheid en verantwoordbaarheid beklemtoon en fondse aangemoedig om teen 2025 die Internasionale Statistiese Klassifikasie van Siektes en Verwante Gesondheidsprobleme en die tiende hersiening van dié kodestruktuur (ICD-10) te aanvaar. Dié stelsel sal onder meer akkuraatheid in pryse en die opsporing van bedrog verbeter. Namfisa reguleer die totale bates van N$1,9 miljard van die mediesefondsbedryf wat bestaan uit agt fondse met ’n ledetal van 214 176. – henriette@republikein.com.na

Premies met (net) 9,9% verhoog

Kommentaar

Republikein 2025-05-02

Meld asseblief aan om kommentaar te lewer

Premies met (net) 9,9% verhoog

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie