Pepfar skenk nog N$1,6 miljard

Elizabeth //Kheibes - Vanaf 1 Oktober sal die Amerikaanse president se noodplan vir vigsverligting (Pepfar) nog N$1,6 miljard in Namibië se MIV/vigs-voorkomings-, sorg- en behandelingsinisiatiewe belê. Só het die program se verteenwoordiger in die land, Cheryl Amoroso, gister aangekondig. Dit volg net een maand nadat Pepfar finansiële hulp van N$45 miljoen vir dié inisiatiewe aangekondig het.Amoroso het dit onthul tydens ’n vergadering van alle Amerikaanse projekhoofde en die media. Sy het bygevoeg Pepfar het oor sy afgelope 18 jaar in Namibië meer as US$1,5 miljard (N$28 miljard) belê in pogings om MIV/vigs uit te roei en die epidemie as ’n openbare gesondheidsbedreiging in Namibië teen 2030 te beëindig.“Soos Namibië epidemiebeheer bereik, ondersteun Pepfar volhoubare inisiatiewe en kwaliteitstandaarde vir MIV- en TB-voorkoming, sorg en behandeling in alle streke van die land. Vir die jaar 2023 sal Pepfar die MIV/TB-reaksieplan ondersteun met US$88 miljoen – meer as 1,6 miljard in Namibiese dollar – in tegniese, finansiële en programbystand.”Dit met die doel om MIV-voorkoming- en behandelingsinisiatiewe te ondersteun, insluitend TB-voorkoming en -behandeling vir mense wat met MIV leef, terwyl daar ook belê word in veerkragtige gesondheidstelsels wat die Namibiese regering se visie vir geïntegreerde primêre gesondheidsorgdienste versterk wat die huidige MIV-beheerplan onderhou en goed geposisioneer is om alle huidige en toekomstige openbare gesondheidsbedreigings te takel, volgens Amoroso.Pepfar het in Julie vanjaar sy 20ste bestaansjaar gevier en staan tans op 94:97:93 ten opsigte van die Verenigde Nasies (VN) se Gesamentlike MIV/vigs-program (Unaids) se doelwit van 95:95:95 vir MIV. Unaids se doelwit vereis dat 95% van mense wat met MIV leef van hul status bewus is, 95% van diegene wat gediagnoseer is om volgehoue antiretrovirale behandeling te ontvang en 95% van diegene wat behandeling ontvang om virale onderdrukking teen 2025 te bereik.“MIV-infeksies het tussen 2004 en 2022 met 65% verminder, nuwe MIV-infeksies onder kinders onder die ouderdom van een jaar het sedert 2002 met meer as 90% afgeneem en MIV-sterftes is met 74% verminder tussen 2004 en 2022,” het Amoroso verder bygevoeg.Die Amerikaanse ambassadeur in Namibië, Randy Berry, het tydens die geleentheid gesê die konstruksie van die ambassade se splinternuwe, moderne gebou van N$300 miljoen het meer as 2 000 werksgeleenthede vir Namibiërs geskep.“Die konstruksie van hierdie gebou is nie net ’n aanduiding van ons blywende vennootskap met Namibië nie, maar ook ons voorneme vir die lang termyn hier,” het hy gesê. – republikein@republikein.com.na

Pepfar skenk nog N$1,6 miljard

Kommentaar

Republikein 2026-05-05

Meld asseblief aan om kommentaar te lewer

Pepfar skenk nog N$1,6 miljard

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.