Otjiwarongo-dokters ‘oorweldig’

Dokters by die Otjiwarongo-staatshospitaal voel die fisieke en emosionele spanning van ’n ernstige personeeltekort, met mediese personeel wat tussen verskillende afdelings moet rondhardloop, lang rye pasiënte en hul frustrasie om soms ure vir behandeling te wag. 

’n Dokter wat met die hospitaal se bedrywighede vertroud is, het verlede week aan Republikein gesê die probleem is nie noodwendig die aantal pasiënte wat behandeling soek nie, maar die beperkte aantal dokters wat beskikbaar is om hulle te sien. 

“Die instroming van pasiënte is nie die probleem nie, maar die tekort,” het die dokter gesê op voorwaarde dat hy/sy nie genoem word nie, uit vrees om oor hul werksomstandighede te praat, hul werk in gevaar kan stel. 

Sy/haar kommer oor ’n kritieke onderbemanningsprobleem word deur die Otjozondjupa-streekraad se onlangse 2025-’26-verslag gesteun, wat 40 dokters as die personeelbehoefte vir dié staatshospitaal lys, terwyl daar tans net agt in diens is. 

Die dokter het gesê die tekort dwing personeel om verskeie afdelings te dek, insluitend ongevalle, die teater, buitepasiënte-afdeling (OPD) en hospitaalsale binne ’n enkele dag of week. 

“By ongevalle voel dit vir my asof dit altyd besig is en hul dokters is baie min. Miskien kry jy soms net twee dokters,” het die bron gesê.

Volgens die bron kan ’n dokter wat in die OPD werk, omtrent 40 pasiënte op ’n dag sien, terwyl daar ook van hom/haar verwag word om na pasiënte om te sien wat in sale opgeneem is. Pasiënte wat soggens aankom, wag soms tot laatmiddag om gesien te word, het die dokter bygevoeg. 

Die werkslading het uitputtend en emosioneel dreinerend geword, het die bron gesê, veral wanneer mediese personeel tussen verskillende verantwoordelikhede beweeg en op bystand bly.

“Dit is baie dreinerend,” het die dokter gesê.

Benewens die versmorende werkslading moet dokters en verpleegpersoneel ook die daaropvolgende frustrasie en kritiek van pasiënte hanteer, wat ure lank vir behandeling wag. Baie beskuldig dan personeel daarvan dat hulle nie hul werk doen nie. 

“Stel jou voor jy werk met soveel verskillende persoonlikhede en iemand kom skree op jou. Sal jy nie buite jou karakter optree nie?” het die bron gevra. 

“Dit is taai, maar terselfdertyd kan ’n mens nie in die openbaar uitkom en hierdie dinge sê nie, want ons loop die risiko om ons werk te verloor,” het die dokter gesê. 

Die hospitaal kan baat vind by die plasing van leerlingdokters, met die bron wat sê interns word meer gereeld by hospitale in Windhoek, Onandjokwe en Rundu gesien. 

“Dit sou lekker wees as ons hier ten minste ’n paar leerlingdokters kon kry.” 

VAKANTE POSTE, GEEN GELD 

Otjozondjupa se streekgesondheidsdirekteur, Gebhardo Timotheus, het verlede week aan Republikein gesê die gaping tussen die hospitaal se personeelstruktuur en sy huidige aantal dokters kan nie bloot as 32 befondsde vakatures beskou word nie. 

Hy het gesê poste bestaan op die personeelstruktuur, maar kan nie geadverteer of gevul word as befondsing nie beskikbaar is nie. “Daardie poste waarna ons verwys – ja, dit is waar, hulle is daar. Maar daar is geen fondse nie. Hulle is nie befonds nie. Daarom kan ons hulle nie adverteer nie. Ons het geen fondse nie,” het Timotheus bevestig. 

Hy het gesê alle befondsde poste vir mediese beamptes in die streek wat tans vakant is, is geadverteer. 

’n Onlangse werwingsadvertensie lys 15 poste vir mediese beamptes oraloor Otjozondjupa, insluitend twee op Otjiwarongo, met aansoeke wat op 20 September sluit. 

Timotheus het gesê daar is geen befondsde poste in die streek wat doelbewus ongevul gelaat word nie. Hy het gesê die tekort is nie uniek aan Otjiwarongo nie, maar raak gesondheidsgeriewe oraloor die streek. 

Die Otjiwarongo-staatshospitaal is sentraal geleë en bedien ’n groter bevolking as sommige ander distrikshospitale, het hy gesê, maar bly ’n distrikshospitaal.

Die hospitaal se agt dokters werk dus steeds teen ’n personeelstruktuur wat 40 vereis, terwyl werwing afhanklik bly van die befondsing wat vir poste beskikbaar gestel word.

– [email protected]