Opknapping van kraamsaal begin

Die kraamsaal by die Katutura-staatshospitaal sal binnekort ’n nuwe baadjie kry.Die opknappingswerk wat reeds verlede week begin het, word deur The Rob Youth Foundation (RYF) en die Namibië Instituut vir Mynbou en Tegnologie (Nimt) gedoen. Die projek, wat volgens die stigting aan die begin van Julie moes begin, is vertraag aangesien dele van die hospitaal geïdentifiseer moes word wat dringend herstelwerk benodig.“Verdere konsultasies met die instandhoudingsafdeling van die ministerie van werke en vervoer was ook nodig,” het RYF gesê.Mnr. Ismael Groenewald van Nimt het gesê sigbare vordering is gemaak, aangesien die opknappings in die stoorkamer begin het, maar het bygevoeg die aflewering van materiaal en die opeenhoping van verpleegsters is ’n struikelblok.Desnieteenstaande het Groenewald ’n teiken van twee weke gestel om die projek te voltooi, en die werk sal deur vakleerlinge verrig word.“Ons leerlinge ken veiligheidsmaatreëls en hulle hou by dié reëls. Ons maak ook seker ons maak nie baie stof nie om die veiligheid van die pasiënte, verpleegsters en werkers te verseker.”Me. Chantel Kamezhou, streekbestuurder van RYF in die Khomasstreek, het gesê ten spyte van die vertraging sal die projek betyds voltooi wees.“Die personeel op die grond is uiters doeltreffend, goed toegerus en opgewasse vir die taak en hulle het ons verseker die projek sal in twee tot drie weke voltooi wees. Hierdie projek lê my na aan die hart. Ten spyte van talle uitdagings, het die Katutura-staatshospitaal die geboortes en redding van talle lewens gefasiliteer.”“Ons het in die regte rigting begin beweeg; probeer om reg te stel wat reggemaak moet word om die doeltreffendheid van die hospitaal te verbeter en uiteindelik te verseker dat die nasie sal baat deur die regering halfpad te ontmoet.”Kamezhou het gesê die stigting is in gesprek met potensiële skenkers.“Ek wil graag mense met die vermoë aanmoedig om aan boord te kom. ’n Vertraging om na iemand se gesondheid om te sien, kan lewensverlies tot gevolg hê en die bietjie wat ons doen, help dus die hospitaal om sy pligte doeltreffend uit te voer.”Die projek sluit in die bou van ’n stoorkamer vir toerusting en medikasie, liasseerrakke, installering van 15 houers vir handseep en ontsmettingsmiddels en die opknapping van personeel se werkstasies en die kombuisarea.– republikein@republikein.com.na

Opknapping van kraamsaal begin

Kommentaar

Republikein 2025-07-03

Meld asseblief aan om kommentaar te lewer

Opknapping van kraamsaal begin

Kommentaar

Republikein 2025-07-03

Meld asseblief aan om kommentaar te lewer

MELD AAN

Advertensie