Onwettige medikasie in kwarantyn

Die uitvoerende direkteur van gesondheid en maatskaplike dienste, Penda Ithindi, sê die Namibiese Inkomste-agentskap (NamRA) het beslag op die hele besending ongeregistreerde malariatablette gelê wat onwettig ingevoer is. Ithindi se kommentaar volg op die minister Esperance Luvindao se verklaring Dinsdag in die parlement dat die betrokke medikasie onwettig die land binnegekom het. Volgens Ithindi is die medikasie ter waarde van N$450 000 verlede maand ingevoer en op die koste van die invoerder West Pharmaceuticals gekonfiskeer. Die besending is volgens hom die enigste een wat ’n ongeregistreerde produk behels wat sonder goedkeuring of vrystelling en soos vereis ingevolge die medisyne en verwante produktewet ingevoer is. “Ander malariamedikasie is regmatig aangekoop en in gebruik om in die behoeftes van die publiek te voorsien,” het hy gesê.Geen betaling is gemaak vir die gekonfiskeerde besending nie weens die onregmatige manier waarop dit sonder die nodige goedkeuring die land ingebring is.“Die kiniensulfaattablette in hierdie besending bly onder ’n amptelike verbod. Die besending is gekonfiskeer en NamRa het dit in kwarantyn geplaas in samewerking met die medisynebeheerraad,” het Ithindi gesê.KOSTEDie aktivis en wetmaker Job Amupanda, wat eerste alarm op sosiale media oor die medikasie gemaak het, het beweer dis teen ’n verhoogde koste aangekoop. In reaksie hierop het die ministerie gesê die koste van farmaseutiese produkte word sterk deur die dinamika in wêreldmarkte beïnvloed, wat aanbod en vraag insluit. “In die konteks van ’n uitbreking lei sulke toestande dikwels tot verhoogde pryse vir items soos kinien wat hoog in aanvraag is,” aldus die ministerie. Mediese kenners het toe die gebruik van kinien bevraagteken en dit as ’n goedkoop en verouderde behandeling vir malaria beskryf.Die ministerie het erken dat Artemether-Lumefantrine die eerstelinie-behandeling vir ongekompliseerde malaria bly, maar Quinine 300 mg-tablette speel steeds ’n noodsaaklike rol as ’n tweedelinie-behandeling.Die tablette is veral noodsaaklik vir pasiënte wat negatiewe reaksies op eerstelinie-medikasie ervaar of wat deel is van kwesbare groepe, wat swanger vroue insluit.Die ministerie het vroeër sy besluit verdedig om die kontrak aan West Pharmaceuticals toe te ken vir die verskaffing van die medikasie sonder om ’n oop tender uit te reik. Laasgenoemde is regverdig deur die dringendheid van die situasie weens ’n styging in malariagevalle. In Mei het die ministerie gesê die keuse het op West Pharmaceuticals geval omdat die maatskappy die vereiste medikasie binne ’n week kon aflewer en sodoende voortgesette behandeling verseker en ’n moontlike tekort aan voorrade kon vermy wat tot meer voorkombare sterftes kon lei. – republikein@republikein.com.na

Onwettige medikasie in kwarantyn

Kommentaar

Republikein 2025-12-19

Meld asseblief aan om kommentaar te lewer

Onwettige medikasie in kwarantyn

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.