Onwettige maermaakspuite stroom oor grens

Buiten vir die veiligheid van pasiënte, gaan dit oor medikasie wat onwettig ingevoer en verkoop word en ook belasting wat ontduik word. Só sê ’n samestellende apteek oor die vloedgolf ongeregistreerde GLP-1-medikasie, asook medikasie wat peptiede bevat wat Namibië instroom. Die Namibië Medisynebeheerraad (NMRC) het ’n sterk waarskuwing gerig aan persone en instellings wat sonder meer die medikasie deur sosiale media, aanlyn verskaffers, informele markte en in sommige gevalle gevestigde gesondheidsgeriewe vir gewigsverlies en diabetes adverteer. Die produkte word onder meer onder die name Wegovoy, Ozempic, Mounjaro, Rybelsus, Upret 30 en TB500+BPC-157 geadverteer. Dit sluit die aktiewe bestanddele semaglutide, tirzepatide, liraglutide en retatrutide in. Onwettige verskaffers bemark dit as maermaakspuite of -petides, ofte wel “skinny jabs”. “Dit gaan eerstens oor die veiligheid van pasiënte, want jy weet nie waar dit vandaan kom nie,” het ’n ingeligte bron gesê. “Dit is ook medisye en moet hand aan hand met ’n dokter gaan en deel van jou behandelingsprotokol wees, jy spuit nie sommer enigiets nie.”Die pasiënt moet daarom ’n mediese ondersoek ondergaan en gemonitor word. “Dit moet ook in ’n yskas gestoor word, wie weet waar dit vandaan kom en hoe dit tot in Namibië gereis het,” maan die bron. Volgens die bron dui die onwettige invoer van ongeregistreerde medisyne op verskillende vlakke van kriminaliteit.“Jy ontduik ook die Namibië Inkomste-agentskap (NamRA), want jy voer dit onwettig in en verkoop dit onwettig as jy nie as ’n groothandelaar vir herverkope geregistreer is nie.”Volgens die bron kom dit neer op smokkel en is geregistreerde verspreiders bewus daarvan dat die betrokke onwettige medikasie oor Namibiese grense stroom. “Daar is dokters wat invoer, selfs skoonheidsterapeute en basies mense wat nie medies gekwalifiseer is nie, selfs groot korporatiewe maatskappye.”Volgens die bron is daar baie mense waaronder aptekers wat dit by die NMRC aanmeld. “Ons het ’n invoerpermit en val onder die NMRC en aptekersraad. Ons het nie ’n webtuiste nie, ons bemark nie en werk bloot op die versoek van ’n dokter op ’n voorskrif van ’n pasiënt.”Die NMRC het gemaan medikasie wat nie by die raad geregistreer is nie, mag nie na Namibië ingevoer, en hier vervaardig, versprei, verkoop, geadverteer of verskaf word nie.Registrasie stel die NMRC in staat om die gehalte, veiligheid en doeltreffendheid van medikasie te bepaal voordat dit in die Namibiese mark beland. Ongeregistreerde medikasie kan die verkeerde aktiewe bestanddeel of sterkte hê; besmet, of ’n namaaksel wees, sonder die gepaste gehaltebeheer vervaardig wees en pasiënte aan ernstige of onbekende gesondheidsrisiko’s blootstel.Die registrateur van medisyne, Frieda Shigwedha, maan in ’n verklaring internasionale reguleerders het ernstige nadelige gevolge aangeteken wat met ongeregistreerde en nagemaakte GLP-1-medikasie verband hou. Dit sluit verkeerde dosisse, besmetting en hospitalisasie in.Sommige van die GLP-1- en medikasie met peptiede wat vir gewigsverlies bemark word, ondergaan ook steeds kliniese ondersoeke en is nog nie goedgekeur vir die aanwysings waarvoor dit bemark word nie. Dit kan ook alleenlik vir navorsingsdoeleindes beoog wees. Volgens Shigwedha erken die NMRC dat die wet vir die beheer van medisyne en verwante middele onderskeid tref tussen die registrasie van medisyne en die wettige, profesionele praktyk van aptekers.“Die kennisgewing moet dus nie geïnterpreteer word as dat dit die wettige samestelling deur ’n apteek en onderneem deur ’n goedgekeurde apteker in ooreenstemming met die wet en ander toepaslike wette verbied nie,” het Shigwedha gesê.Persone wat die wet oortree, kan onderwerp word aan inspeksie, die beslaglegging van produkte, vervolging en die boetes soos vervat onder die wet. Gee grasietydperk is ook van toepassing nie.Buiten vir die aankoop en voorskryf van ongeregistreerde medikasie, moet alle bemarkingsmateriaal van webtuistes en sosialemediaplatforms verwyder word. Die publiek word gemaan om net medikasie van Namibies-gelisensieerde aptekers en goedgekeurde geriewe te koop. Die NMRC se inspektoraat kan by (061) 203 2400 of NMRC.Inspectors@mhss.gov.na gekontak word oor vermoedelik onwettige medisyne. – henriette@republikein.com.na

Onwettige maermaakspuite stroom oor grens

Kommentaar

Republikein 2026-09-09

Meld asseblief aan om kommentaar te lewer

Onwettige maermaakspuite stroom oor grens

Kommentaar

Republikein 2026-09-09

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.